२० फाल्गुन २०७१, बुधबार १०:०७ बुधवार साप्ताहिक, नयाँबानेश्वर, काठमाण्डौं

महानगरमा आफूखुसी कर छुट

काठमाडौं । काठमाडौं महानगरपालिकाले कर छुटमा मनपरी गर्दै आएको तथ्य फेला परेको छ । नगरको राजस्व शाखाका कर्मचारीहरूले कमिसन लिएर नियमले नमिल्ने स्थानमा पनि आफूखुसी कर छुट गर्दै आएको तथ्य बुधबारले फेला पारेको छ । महाशाखा प्रमुख नुरनिधि न्यौपाने र प्रशासन प्रमुख रामप्रसाद पौडेल मिलेर त्यसरी कर छुट गराएको थाहा भएको छ ।
नगरका विभिन्न स्थानमा भएका नम्बरी जग्गा र त्यसमा बनेका घर टहराबापत  वार्षिक कर लाग्ने नियम छ । तर, घरजग्गा कर ऐन अनुसार सहरी क्षेत्रको कुनै घरजग्गा भत्की, बिग्री बस्न नहुने भएमा नेपाल सरकारले यस्तो घरमा प्रचलित ऐन अनुसार लाग्ने करको केही भाग वा पूरै माफी गर्न सक्ने व्यवस्था छ । सो एनेको दफा १० को १ मा यस्तो व्यवस्था भए पनि विभिन्न नाफामूलक उद्देश्यले खोलिएका शिक्षालय र अन्य कारोबार गर्ने संस्थाहरूलाई कर छुटको व्यवस्था छैन । तर, महानगरले कलंकीमा रहेको एलआरआई स्कुल, सामाखुसीको आत्मज्ञान प्रचार संघलगायतलाई ०६८ कात्तिक १३ गतेको निर्णयले कर छुट गरेको हो । महानगरले त्यस्ता संस्थालाई कर छुट भएको भन्दै पत्रसमेत दिएको छ । त्यस्ता संस्था दर्जनौं रहेको महानगर स्रोतले बतायो । प्रशासन प्रमुख रामप्रसाद पौडेलको दबाबमा च्यानल मिलाएर छुट गरिएको हुनाले छुट पत्रमा महाशाखा प्रमुखलगायतका साथै प्रशासन प्रमुख पौडेललाई पनि हस्ताक्षर गराइएको छ । आफू मात्र फसिने डरले पौडेलकै दबाबमा कर छुट गराइएकाले पत्रमा उनलाई समेत हस्ताक्षर गराइएको महानगरका एक कर्मचारीले बताए ।