२३ बैशाख २०७३, बिहीबार ०९:४२ बुधवार साप्ताहिक, नयाँबानेश्वर, काठमाण्डौं

दुइटा हरि मिलेपछि

काठमाडौं । १५ दिनअघि मात्रै पूर्वसभासद् हरि रोका कृषि विकास मन्त्रालयमा एउटा प्रस्ताव लिएर गए । एमाले, माले हुँदै आफ्नै पार्टीमा आएर सभासद् भएका रोकाले प्रस्ताव ल्याएपछि कृषि विकासमन्त्री हरिबोल गजुरेलले नाइँनास्ती गर्ने कुरै भएन । करिब २ लाखबराबरको त्यो कामको जिम्मा मन्त्रीले रोकालाई दिए ।
काम थियो, किसानहरूको वर्गीकरण । आफू मन्त्री भएलगत्तै गजुरेलले किसानहरूको वर्गीकरण गर्ने आकर्षक प्रस्ताव अगाडि सारेका थिए । मन्त्रालयले जारी गरेको २७ बुँदे प्रतिबद्धतामा पनि सो कुरालाई अटाए । यसअघि, मन्त्रालयले किसानहरूको वर्गीकरण गर्ने कार्य सुरु गरेको भए पनि त्यो त्यति प्रभावकारी र वैज्ञानिक नभएको कुरा उठिरहेको थियो । काठमाडौंलगायत केही जिल्लामा किसानहरूको वर्गीकरण गर्न थाले पनि वर्गीकरणको कार्य वैज्ञानिक नभएको हुँदा त्यससम्बन्धी कार्यविधि बनाएर अगाडि बढ्न रोकालाई जिम्मा दिइएको थियो ।
मन्त्री गजुरेलसमक्ष रोकाले यो मेरो रुचिको विषय हो भनेपछि करसहित २ लाखको कामको जिम्मेवारी रोकाले पाएका हुन् । उनले १५÷२० दिनअघि मात्रै मन्त्रालयमा त्यस्तो प्रस्ताव लिएर गएका थिए । दाङ, सप्तरीलगायतका जिल्लामा गएर अध्ययन गरेका हुँदा पनि कार्यविधि बनाउन रोकालाई सजिलो हुन पुगेको बताइन्छ ।
किसानहरूको वर्गीकरण हुँदा त्यसले कुन किसानलाई कस्तो अनुदान, ऋण सहुलियत दिने भन्नेबारे प्रस्ट हुने मन्त्रालयका प्रवक्ता योगेन्द्रकुमार कार्कीले बताए । अहिलेसम्म मन्त्रालयअन्तर्गतका विभिन्न आयोजनाले वितरण गर्दै आएको अनुदान रकम र सहुलियत दरको ऋणमा पहुँच भएका व्यक्तिहरूको मात्रै हालीमुहाली रहेको कुरा बारम्बार उठ्ने गरेको हुँदा वर्गीकरण गरेपछि अनुदान र सहुलियत ऋण दिन सजिलो पर्ने बताइन्छ । प्रवक्ता कार्कीले भने– ‘वर्गीकरण भएपछि किसानले पाउने सहुलियत स्पष्ट हुनेछ ।’