५ माघ २०७३, बुधबार ०७:४७ बुधवार साप्ताहिक, नयाँबानेश्वर, काठमाण्डौं

अधिकृतको परीक्षक आईए उत्तीर्ण !

काठमाडौं । लोकसेवा आयोगको अधिकृत स्तरको जाँच लिने परीक्षकको शैक्षिक योग्यता कति हुनुपर्छ ? परीक्षार्थी नै स्नातक उत्तीर्ण गरेका मात्र हुने भएकाले कापी जाँच्ने स्नातकोत्तर उत्तीर्ण वा त्यो नभए पक्कै पनि कम्तीमा स्नातक तह उत्तीर्ण गरेको हुनैपर्छ । तर, जम्मा आईकम पास गरेको व्यक्तिले अधिकृतको जाँच लिने गरेको भन्दा जोकोहीलाई अपत्यारिलो लाग्नु स्वभाविक नै हो ।
स्रोतका अनुसार राजधानीमा ‘आभास’ नामक एक संस्था सञ्चालन गर्दै आएका पुरुषोत्तम घिमिरेले लोकसेवा आयोगलाई समेत गुमराहमा राखेर अधिकृत स्तरको परीक्षण गर्ने गरेका छन् । जम्मा आईकम उत्तीर्ण गरेका घिमिरेकोे त्यो संस्थाको मुख्य काम भनेको अधिकृतलाई अडियो–भिडियोसम्बन्धी जाँच लिने हो । सेना, प्रहरी तथा सशस्त्र प्रहरीलाई अडियो–भिडियोसम्बन्धी तालिम पनि यिनैले दिने गरेका छन् । त्यो तालिमको अंकभार सेना, प्रहरीको बढुवामा जोडिने गर्छ । तर, घिमिरेले तालिम नै नदिई १० हजार रुपैया लिँदै प्रमाणपत्र बेच्ने गरेको स्रोतको दाबी छ । डिप्लोमा तहको तालिम सञ्चालन गर्न पनि सञ्चालक कम्तीमा डिप्लोमा पास गरेको हुनुपर्छ, तर हाल जोरपाटीमा बस्दै आएका आईकम पास घिमिरेले १० हजारमा बचेका प्रमाणपत्र लिएर सेना र प्रहरीमा सयौं बढुवा भइसकेको स्रोतले बतायो ।