३१ चैत्र २०७३, बिहीबार ०७:३९ बुधवार साप्ताहिक, नयाँबानेश्वर, काठमाण्डौं

‘टिकट’ मा जिल्ला अध्यक्षको सही नचल्ने

काठमाडौं । नेकपा (एमाले) ले प्रदेश संयोजक र पार्टी केन्द्रीय अध्यक्षको हस्ताक्षरबाट मात्रै स्थानीय तहमा पार्टीका उम्मेदवारहरूलाई टिकट वितरण गर्ने भएको छ । स्थायी समितिको सोमबारको बैठकमार्फत एमालेले यस्तो निर्णय लिएपछि टिकट जिल्ला अध्यक्षको हस्ताक्षर अब नचल्ने निश्चित भएको हो ।

यसअघि वडा अध्यक्ष र सदस्यहरूको टिकट जिल्ला अध्यक्षले नै हस्ताक्षर गरेर बाँड्ने भनिए पनि निर्वाचन आयोगमा मनोनयनमा अप्ठ्यारो पर्ने कारण जनाउँदै प्रदेश संयोजक र केन्द्रीय अध्यक्षको हस्ताक्षरबाट मात्रै वितरण गर्ने एमालेले निर्णय लिएको हो । गाउँपालिका र नगरपालिकाका अध्यक्ष, उपाध्यक्ष÷प्रमुख, उपप्रमुख, गाउँ, नगर, उपमहानगर, महानगरका वडा अध्यक्ष र सदस्यहरूको उम्मेदवारको मनोनयनको औपचारिक पत्र प्रदेश संयोजकहरूले प्रदान गर्ने एमालेको निर्णयमा उल्लेख छ । त्यस्तै, महानगरपालिका तथा उपमहानगरपालिकाका प्रमुख र उपप्रमुखको उम्मेदवारको मनोनयनको औपचारिक पत्र भने पार्टीका केन्द्रीय अध्यक्षले प्रदान गर्ने एमालेले निर्णय गरेको छ ।