अभिव्यक्तिमा प्रस्तुत भए युद्धकवि राई
काठमाडौं । नेपाली प्रतिभा प्रतिष्ठान बेलायतले बर्सेनि आयोजना गर्दै आएको कार्यक्रम ‘अभिव्यक्ति शृङ्खला’को एघारौंं संस्करणमा युद्धसाहित्यका परिकल्पनाकार, आख्यानकार तथा कवि गणेश राई आफ्ना एक दर्जन युद्धकवितासहित प्रस्तुत भए । पूर्वी नेपालको खोटाङ स्थायी घर भई हाल पूर्वी लन्डनमा बसोबास गरिरहेका राईले युद्धसाहित्यबारे संक्षेपमा प्रकाश पारिसकेपछि कविता लेखनबारे आफ्नो धारणासहित कविता वाचन आरम्भ गरेका थिए ।
२२ सेप्टेम्बरका दिन लन्डननजिकै हाइवेकमको क्लिनउड कम्युनिटी हाउसमा आयोजित भव्य समारोहमा कवि राईले आफ्ना युद्धसम्बन्धी कविता सुनाउँदा श्रोता तथा दर्शक भावुक बने । घरीघरी उत्तेजित पनि भए । ‘राईफलले फलाकेको जिन्दगी’ नामक युद्धकविता कृतिसहित ६ वटा कृतिका सर्जक पूर्वब्रिटिस गोर्खा सैनिकसमेत रहेका राईका शक्तिशाली कविता सुनेपछि कार्यक्रमका प्रमुख अतिथि बीबीसी नेपाली सेवा यूकेका पूर्वप्रमुख खगेन्द्र नेपालीले ‘राईका कविता सुनेपछि आफू स्क्रिप्ट हराएको रेडियो प्रस्तोताजस्तो’ भएको बताए । युद्धकवि राईका वाचित कवितामाथि प्रतिष्ठानका संरक्षक, डायास्पोरा सिद्धान्तकार, कवि तथा आख्यानकार रक्ष राईले समीक्षा गरेका थिए ।
कार्यक्रममा प्रतिष्ठानका पूर्वअध्यक्ष दयाकृष्ण राई, उपाध्यक्ष टंक वनेम, कोषाध्यक्ष देवेन्द्र खेरेस र सहसचिव अञ्जु अञ्जलीले संस्थाका गतिविधिबारे प्रकाश पारेका थिए । उक्त अवसरमा जानु काम्बाङ लिम्बू, भावना परिष्कृत सुनुवार, अग्निप्रसाद लिम्बू, दीपक लिम्बू र उमाकान्त गुरुङलाई प्रतिष्ठानको आजीवन सदस्यता प्रदान गरिएको थियो ।
प्रतिष्ठानका महासचिव मिजास तेम्बेका अनुसार बेलायतमा रहेका नेपाली स्रष्टाहरूको सम्मान र उनीहरूका सिर्जनाहरूको प्रवद्र्धन गर्ने उद्देश्यले सन् २००८ देखि सुरु गरिएको ‘अभिव्यक्ति शृंखला’मा यसअघि गायक तथा संगीतकार चोक गुरुङ, कवि दयाकृष्ण राई, कवि टंक वनेम, संगीतज्ञ किशोर गुरुङ, गजलकार अञ्जु अञ्जली, गायक तथा संगीतकार नोर्देन तेन्जिङ भुटिया, कवि तथा गीतकार शशी थापा सुब्बा, कवि रक्ष राई, गीतकार निर्मला परिवेश राई र कवि डा. रूपक श्रेष्ठ प्रस्तुत भइसकेका छन् ।
तीन चरणमा सम्पन्न कार्यक्रममा बेलायत भ्रमणमा रहेका कवि मदन राई ‘लामाखुले’ले नेपाली साहित्यमा बेलायतमा रहेका नेपाली भाषी साहित्यकारको उल्लेखनीय योगदान रहेको उल्लेख गरे । कार्यक्रममा डा. रूपक श्रेष्ठ, भावना परिष्कृत सुनुवार, चोक गुरुङ, भगवान चाम्लिङ, जानु काम्बाङ लिम्बू र सेमन्त राईले आ–आफ्ना रचना सुनाएका थिए ।
सम्बन्धित समाचार
- चीनमा शक्तिशाली भूकम्प, एक सयभन्दा बढीको मृत्यु
- प्रधानमन्त्री प्रचण्ड आज स्वदेश फर्किंदै
- अमेरिकाका राष्ट्रपति बाइडेन र चीनका राष्ट्रपति सीबीच भेटवार्ता
- विश्वकप छनोट : आज नेपाल र यूएई भिड्दै
- राष्ट्र संघका महासचिव एन्टोनियो आज सोलुखुम्बु जाँदै
- पहिलो पटक कुल आचार्य र बद्री केसीलाई गैरआवासीय नेपाली नागरिकता
- एनआरएनलाई नागरिकता दिलाउन ठूलो संघर्ष गर्नुपर्यो -प्रधानमन्त्री प्रचण्ड
- इजरायलबाट २५४ बिद्यार्थीलाई आज नेपाल ल्याइँदै
- इजरायलमा मारिएका साहका परिवारलाई मधेस प्रदेश सरकारले ५ लाख राहत दिने
- इजरायलमा मृत्यु भएका नेपालीको शोकमा भोली सार्वजनिक बिदा
- मन्त्रिपरिषद्को विशेष बैठक आव्हान
- एक दिवसीय विश्वकप क्रिकेट आजदेखि भारतमा शुरु
Leave a Reply