१९ मंसिर २०७५, बुधबार ०४:४९ बुधवार साप्ताहिक, नयाँबानेश्वर, काठमाण्डौं

एनआईसी एसियाको सीईओमा न्यौपाने

काठमाडौं । एनआईसी एसिया बैंक लिमिटेडको प्रमुख कार्यकारी अधिकृत (सीईओ) मा रोशनकुमार न्यौपाने नियुक्त भएका छन् । तत्कालीन प्रमुख कार्यकारी अधिकृत लक्ष्मण रिसालको राजीनामापछि न्यौपानेले कायममुकायम प्रमुख कार्यकारी अधिकृतका रूपमा बैंकको नेतृत्व सम्हाल्दै आएका थिए ।
आन्तरिक लेखापरीक्षण विभाग प्रमुखका रूपमा तत्कालीन बैंक अफ एसिया नेपाल लिमिटेडबाट बैंकिङ क्षेत्रमा प्रवेश गरेका न्यौपानेले बैंकको प्रमुख जोखिम अधिकृत, सहायक प्रमुख कार्यकारी अधिकृत, तथा नायव प्रमुख कार्यकारी अधिकृतका रूपमा नेतृत्व सम्हालेका छन्। न्यौपाने चार्टड एकाउन्टेन्ट समेत हुन् । न्यौपानेलाई सञ्चालक समितिका अध्यक्ष तुलसीराम अग्रवालले पद तथा गोपनीयताको शपथ ग्रहण गराएका छन् । अधिकृत न्यौपानेले बैंकका ग्राहकलाई उत्कृष्ट, सरल एवं सुलभ बैंकिङ सेवाप्रदान गरी ‘समृद्ध नेपाल, सुखी नेपाली’को राष्ट्रिय संकल्पले परिकल्पना गरेबमोजिम सबै सरोकारवालाको सर्वाङ्गीण आर्थिक समृद्धिका लागि एक उत्कृष्ट बैंकका रूपमा स्थापित गर्ने बताएका छन् ।
एनआईसी बैंकले मुलुकभर २ सय ६५ शाखा कार्यालय, २ सय ७० एटीएम, ३७ वटा एक्सटेन्सन काउन्टर एवं १८ वटा शाखारहित बैंकिङ एकाइमार्फत बैंकिङ सेवा प्रदान गर्दै आएको छ ।