८ फाल्गुन २०७५, बुधबार ०३:३६ बुधवार साप्ताहिक, नयाँबानेश्वर, काठमाण्डौं

विमानस्थलको जग्गा मुआब्जामा करोडौंको घोटाला

काठमाडौं । अख्तियारका आयुक्त राजनारायण पाठकको भ्रष्टाचारलाई पनि माथ खुवाउने गरी भएको अर्को एउटा दसौं करोड घोटालाको विषयमा अहिले अख्तियारले छानबिन प्रक्रिया अगाडि बढाएको छ । त्यो विषय हो, भैरहवा विमानस्थलको जग्गा मुआब्जा । जग्गाको वास्तविक क्षेत्रफलभन्दा ट्रायल चेकमा दोब्बर बढाएर गरिएको दसौं करोड घोटालामा अख्तियारले छानबिन प्रक्रिया अगाडि बढाएपछि यसमा संलग्न नागरिक उड्डयन प्राधिकरण र भूमिसुधारका कर्मचारीहरूको छटपटी सुरु भएको छ ।
नागरिक उड्डयन प्राधिकरणले राष्ट्रिय गौरवका विमानस्थल भैरहवा विमानस्थल र पोखरा विमानस्थलको जिम्मा प्रदीप अधिकारीलाई दिएको छ । उनै अधिकारीले मालपोत र नापीका कर्मचारीसँग सेटिङ मिलाएर करोडौं रुपैयाँ घोटाला गरेको बुझिएको छ । स्रोेतका अनुसार जग्गाको मुआब्जा दिँदा वास्तविक क्षेत्रफलभन्दा ट्रायल चेकमा दोब्बर बढाएर दिइएको छ । वास्तविक जग्गा चार कट्ठा छ भने टायल चेकमा आठ कट्ठा बनाएर बढी जग्गाको मुआब्जाको आधा रकम जग्गाधनी र आधा रकम अधिकारीसहितका कर्मचारी मिलेर झ्वाम पारेका हुन् । त्यति मात्र होइन, अधिकारीले सो विमानस्थलको परामर्शको ठेक्का ईएमआरसी नामक कम्पनीलाई दिँदा पनि करोडौं फाइदा लिएको बताइन्छ । आफ्नै भाइलाई पार्टनर बनाएर एएमआरसीलाई दिएको बुझिएको छ ।
जग्गा मुआब्जा घोटाला प्रकरणमा प्राधिकरणका महानिर्देशक सञ्जीव गौतमको पनि मिलेमतो भएको बताइन्छ । त्यति मात्र होइन, यसमा मन्त्रीदेखि सचिवको संलग्नता रहेको आशंका गरिएको छ ।