४ असार २०७६, बुधबार ०८:११ बुधवार साप्ताहिक, नयाँबानेश्वर, काठमाण्डौं

प्रधानमन्त्रीको सम्बोधन आज

काठमाडौं । प्रधानमन्त्री केपी शर्मा ओलीले प्रतिनिधि सभा बैठकलाई आज अपराह्न ४ बजे सम्बोधन गर्दै छन् । युरोप भ्रमण र समसामयिक विषयमा बोल्न समय माग गरेपछि हिजै सभामुख कृष्णबहादुर महराले उनलाई बोल्न समय दिएका थिए । सम्बोधन गर्न प्रधानमन्त्री ओली रोस्टममा पुगेपछि प्रतिपक्षी सांसदहरूले नाराबाजी गरेर बोल्न दिएका थिएनन् । त्यसपछि सभामुखले आजसम्मका लागि बैठक स्थगित गरेका थिए । आजको बैठकको पहिलो कार्यसूची प्रधानमन्त्रीको सम्बोधन नै रहेको छ ।
प्रतिपक्षी नेपाली कांग्रेसका सांसदहरूले प्रधानमन्त्रीभन्दा अगाडि बोल्न समय मागेका थिए । तर, सभामुखले प्रधानमन्त्रीले सम्बोधन गरेपछि बोल्न समय दिने भन्दै बस्नका लागि पटकपटक आग्रह गरे पनि उनीहरूले कुनै टेरपुच्छर लगाएनन् । बरु अगाडि बढेर बेल घेर्न पुगे । बैठक सुरु हुनुअघि कसलाई पहिला बोल्न दिने भन्नेबारे सत्तापक्ष र प्रतिपक्षका प्रमुख सचेतकबीच विभिन्न चरणमा छलफल भए पनि सहमति जुट्न सकेको थिएन । कुनै सहमति नजुटेपछि सभामुखले प्रधानमन्त्रीलाई पहिला बोल्न समय दिएका थिए ।