३० श्रावण २०७६, बिहीबार ०७:३६ बुधवार साप्ताहिक, नयाँबानेश्वर, काठमाण्डौं

प्रधानमन्त्री ओली स्वदेश फिर्ता

काठमाडौं । प्रधानमन्त्री केपी शर्मा ओली सिंगापुरमा १० दिन लामो स्वास्थ्योपचारपछि सोमबार स्वदेश फर्किएका छन् । त्यस अवसरमा प्रधानमन्त्री ओलीलाई प्रतिनिधिसभाका सभामुख कृष्णबहादुर महरा, राष्ट्रियसभाका अध्यक्ष गणेशप्रसाद तिमिल्सिना, उपप्रधानमन्त्री एवं रक्षामन्त्री ईश्वर पोखरेल, नेकपाका नेताहरू वामदेव गौतम, सुवास नेम्वाङलगायतले त्रिभुवन अन्तर्र्रािष्ट्रय विमानस्थलमा स्वागत गरेका थिए ।
१२ वर्षअघि मिर्गौला प्रत्यारोपण गराएका प्रधानमन्त्री ओली साउन १८ गते स्वास्थ्य उपचारका लागि सिंगापुर प्रस्थान गरेका थिए । मिर्गाैलाको मात्र उपचार हुने विश्वकै उत्कृष्ट मानिने नेसनल युनिभर्सिटी हस्पिटलमा उनको स्वास्थ्य परीक्षण गरिएको थियो । अघिल्लो सोमबारबाटै स्वास्थ्य परीक्षणको काम सुरु भए पनि सबै परीक्षणको रिपोर्ट आउन ढिलो भएपछि यो सोमबार मात्र उनी स्वदेश फर्किएका हुन् । त्यसअघि शुक्रबारै नेपाल फर्कने कार्यक्रम थियो । रिपोर्ट नआएपछि शनिबारलाई नेपाल फर्कने कार्यक्रम सारिए पनि त्यस दिन पनि रिपोर्ट आउन ढिला भएपछि सोमबार सारिएको हो । सबै रिपोर्ट प्राप्त भएपछि प्रधानमन्त्री ओली स्वदेश फर्किएका हुन् ।
विमानस्थलमा सञ्चारकर्मीहरूसँग कुरा गर्दा आफ्नो स्वास्थ्य अवस्था ठीक भएको बताए । विदेश भ्रमणबाट फर्कंदा पत्रकार सम्मेलन गर्ने गरेका प्रधानमन्त्री ओलीले यसपटक भने पत्रकार सम्मेलन नगरी बाहिरिए भने भ्रमण अनौपचारिक भएको भन्दै सेनाको सलामी पनि लिएनन् । प्रधानमन्त्री ओलीका साथमा धर्मपत्नी राधिका शाक्य, प्रधानमन्त्रीका राजनीतिक सल्लाहकार विष्णु रिमाल, जनसम्पर्क सल्लाहकार अच्यूत मैनाली र निजी चिकित्सक दिव्या शाह पनि सिंगापुर गएका थिए ।