३० श्रावण २०७६, बिहीबार ०८:१३ बुधवार साप्ताहिक, नयाँबानेश्वर, काठमाण्डौं

कास्की –२ मा विद्याको चर्चा

काठमाडौं । निर्वाचन आयोगले आगामी मंसिर १४ गते उपनिर्वाचनको मिति घोषणा गरेसँगै संघीय संसद्मा रिक्त कास्की क्षेत्र नं. १ मा नेकपाले कसलाई उम्मेदवार बनाउला भन्ने चर्चा बिस्तारै चुलिँदै गएको छ । तत्कालीन पर्यटनमन्त्री रवीन्द्र अधिकारीको हेलिकोप्टर दुर्घटनामा निधन भएपछि खाली रहेको सो क्षेत्रमा रवीन्द्र पत्नी विद्या भट्टराईलाई उठाउनेबारे नेकपाभित्र अनौपचारिक छलफल सुरु भएको बुझिएको छ ।
केही दिनअघि नेकपाका सचिवालय सदस्य वामदेव गौतमले सो क्षेत्रमा रवीन्द्र पत्नी विद्याको नाम अनौपचारिक रूपमा शीर्ष नेताहरूसँग प्रस्ताव गरेसँगै उम्मेदवारको चर्चा सुरु भएको हो । त्यसो त रवीन्द्रको निधन हुनासाथ त्यहाँ पत्नी विद्यालाई रवीन्द्रको उत्तराधिकारीका रूपमा खडा गर्नुपर्ने आवाज नउठेको होइन । तर सुरुमा विद्याले आफंैले आफ्नो रुचि नभएको बताएकी थिइन् । तर विगतमा अनेरास्ववियुको सचिवालय सदस्यसम्म भएकी विद्याले पछिल्लो समय केही सञ्चारमाध्यमसमक्ष निर्वाचन लड्न सक्ने संकेत गरेपछि त्यहाँ नेकपाले उनैलाई अघि सार्ने तयारी गरिरहेको बुझिएको छ ।
सो क्षेत्रबाट नेकपाका अरू आकांक्षी नै नभएको भने होइन । तर, विद्याको नामको चर्चा सुरु भएसँगै आकांक्षीहरूले मुख खोलेका छैनन् । अध्यक्ष केपी शर्मा ओलीले सो क्षेत्रमा वामदेव गौतमलाई उठ्न आग्रह गरे पनि उनले सो प्रस्ताव इन्कार गरेर विद्याकै नाम प्रस्ताव गरेको कुरा सार्वजनिक भइसकेको छ । त्यसबाहेक सोमनाथ अधिकारी प्यासी, तुलबहादुर गुरुङ, रश्मि आचार्यलगायतलाई पनि सो क्षेत्रको सम्भावित उम्मेदवारका रूपमा हेरिएको छ ।
पछिल्ला तीन निर्वाचनमा निर्वाचित रवीन्द्र गत निर्वाचनमा यस क्षेत्रबाट २७ हजार २ सय ७ मत प्राप्त गरी विजय भएका थिए । निकटतम प्रतिस्पर्धी नेपाली कांग्रेसका देवराज चालिसेलाई उनले ८ हजार ५ सय ४५ अन्तरले पराजित गरेका थिए । कांग्रेसले भने चालिसेलाई नै खडा गर्ने सम्भावना रहेको बताइन्छ ।