४ भाद्र २०७६, बुधबार ०१:२९ बुधवार साप्ताहिक, नयाँबानेश्वर, काठमाण्डौं

कार्यविभाजन सकियो

काठमाडौं । पार्टी एकीकरणको १५ महिनापछि नेपाल कम्युनिस्ट पार्टी (नेकपा) को कार्यविभाजनले करिब करिब पूर्णता पाएको छ । अहिलेसम्म ४ सय ४१ सदस्यीय केन्द्रीय कमिटी सदस्यमध्ये केन्द्रीय अध्यक्षसहित साढे ३ सयभन्दा बढीले जिम्मेवारी पाएका छन् ।
सात प्रदेशमा इन्चार्ज, सहइन्चार्जसहित २८ जनालाई जिम्मेवारी तोकिएको छ । ७७ भूगोलका जिल्लामा डेढ सय बढीलाई इन्चार्ज र सहइन्चार्जको जिम्मेवारी दिइएको छ । त्यस्तै, विशेष जिल्लाअन्तर्गत एक दर्जन केन्द्रीय नेताले जिम्मेवारी पाएका छन् भने केन्द्रीय सम्पर्क कमिटीअन्तर्गत प्रदेश सम्पर्क कमिटीहरूमा डेढ दर्जन केन्द्रीय सदस्यहरूले जिम्मेवारी पाएका छन् । उता ३२ ओटा विभागमा ७० जनाभन्दा बढी केन्द्रीय सदस्यहरूलाई नयाँ जिम्मेवारी तोकिएको छ । दुईजना केन्द्रीय सदस्यले केन्द्रीय कार्यालयको जिम्मेवारी पाएका छन् । त्यस्तै २२ ओटा जनसंगठनमा करिब ५० जना केन्द्रीय सदस्य, प्रतिष्ठान र पार्टीसम्बद्ध विशेष संगठनहरूमा एक दर्जन केन्द्रीय सदस्यहरूले नयाँ जिम्मेवारी पाएका छन् । बाँकी रहेका केन्द्रीय सदस्यहरूलाई भने भारत प्रवास र भारतबाहेकका प्रवास कमिटी तथा छुटफुट केन्द्रीय सदस्यहरूलाई आवश्यकताअनुसार भूगोल वा विभागीय जिम्मेवारी तोक्ने बुझिएको छ । अब नेकपाभित्र तीनओटा केन्द्रीय आयोग निर्वाचन, अनुशासन र लेखा आयोग, केन्द्रीय सल्लाहकार र ज्येष्ठ कम्युनिस्ट मञ्च मात्र गठन हुन बाँकी छ । यी काम सकिनासाथ नेकपाको एकीकरणले पूर्णता प्राप्त गर्नेछ । केही दिनभित्रै यी सबै काम सम्पन्न हुने भएकाले अब नेकपाले संगठन परिचालन र सरकारको काम प्रभावकारी बनाउने कुरामा मात्र सम्पूर्ण ध्यान केन्द्रित गर्दा नेकपाले लामो समयसम्म मुलुकको नेतृत्व गर्न सक्ने अनुमान गर्न सकिन्छ ।