२८ माघ २०७७, बुधबार ०५:५१ बुधवार साप्ताहिक, नयाँबानेश्वर, काठमाण्डौं

छाया आईजीको चुरीफुरी

काठमाडौं । नेपाल प्रहरीको एआईजी विश्वराज पोखरेलको दादागिरीले सीमा नाघेको छ । अबको दुई वर्षपछिको निर्विरोध आईजी आफैं हो भन्दै उनले महानिरीक्षक शैलेश थापा क्षेत्रीमाथि पनि हस्तक्षेप गर्न थालेको बताइन्छ ।
अहिले निर्वाचन हेर्नेगरी मुख्यालयले उनलाई जिम्मा दिएकाले पनि एआईजी पोखरेलको चुरीफुरी बढेको बताइन्छ । निर्वाचनका लागि बजेटसमेत ठूलो अंकमा निकासा गर्न सकिने र त्यसको बाँडफाँट आफ्नो तजबिजमा गर्न सकिने भएकाले उनले रोजेरै त्यो जिम्मा लिएको बताइन्छ ।
अहिले एआईजी पोखरेल यति धेरै हाबी छन् कि सानो–सानो सरुवा बढुवा पनि आईजी थापाले गर्न सक्दैनन् । त्यसो त हरि पालका अगाडि पनि आईजी थापा निरीह बन्ने गरेको प्रहरी मुख्यालय स्रोतले बतायो । दुई वर्षपछि आफूले नै चलाउने हो भन्दै आईजी थापालाई भूमिकाविहीन पारेर अहिलेदेखि नै एआईजी पोखरेलले सेटिङ थालेको बताइएको छ ।
पछिल्लो समय आफैं छाया आईजी हो भन्दै उनले प्रहरीको ठेक्कापट्टामा समेत हस्तक्षेप गर्न थालेको बताइएको छ । पछिल्लो समय निर्माण हेर्ने प्राविधिक निर्देशनालयमा हुने कमिसनको चलखेलका कारण भवनहरू भत्कने, बिग्रनेजस्ता समस्या आउने गरेका छन् । नेपाल सरकारले दिएको बजेटबाट नेपाल प्रहरीका धेरै भवन निर्माण भइरहेका छन् । प्रहरीका भवन निर्माणका लागि करिब १ अर्ब रुपैयाँ बजेट निर्माणमा छुट्याइएको छ ।
बजेटको ठूलो हिस्सा लुम्बिनी प्रदेशमा परेको छ । त्यहाँको बजेट परिचालनको जिम्मा इन्जिनियर सुमन दाहालले पाएका छन् । उनी प्रहरी निरीक्षक हुन् । तर, विश्वराज पोखरेलले नै त्यहाँ पनि हस्तक्षेप गरी काम जस्तोसुकै होस्, माथिसमेत बुझाउनुपर्ने हुनाले कमिसन राम्रै मिलाउनुपर्छ भन्दै अनियमितता गरेको बताइएको छ । एआईजी पोखरेलले जहाँ सबैभन्दा बढी प्रहरीका भवन निर्माणमा अनियमितताका कुरा सार्वजनिक भएका छन्, त्यहाँ उनकै हस्तक्षेप चल्ने गरेको छ । एआईजी पोखरेलकै योजनामा सिनियर एसपीहरूले भनेजति कमिसन नदिएपछि जुनियर ओभरसियरहरूलाई प्रदेशमा निर्माण हेर्न खटाउने गरिएको छ ।