२८ माघ २०७७, बुधबार ०५:५७ बुधवार साप्ताहिक, नयाँबानेश्वर, काठमाण्डौं

कार्यविधि कुल्चेर एमडी नियुक्त

काठमाडौं । कायममुकायम भएर जिम्मेवारी सम्हालिरहेका नेपाल विद्युत् प्राधिकरणका कार्यकारी–निर्देशक हितेन्द्रदेव शाक्यलाई पूर्ण जिम्मेवारी सुम्पिएको छ । उनलाई बिनाप्रतिस्पर्धा नै प्राधिकरणको कार्यकारी–निर्देशकमा नियुक्त गरिएको हो ।
गएको भदौमा कुलमान घिसिङको चार वर्षे पदावधि सकिएपछि प्राधिकरण कायममुकायमको भरमा चल्दै आएको थियो । घिसिङको अवधि सकिने बेलामा उनलाई नै निरन्तरता देला कि भन्ने अपेक्षा सबैले राखेका थिए । तर, घिसिङलाई निरन्तरता नदिई प्राधिकरणका उपकार्यकारी निर्देशक लेखनाथ कोइरालालाई निमित्त दिइएको थियो । पछि भने कोइरालालाई हटाएर हितेन्द्रदेवलाई ल्याइएको थियो ।
घिसिङले अवकाश पाएपछि नयाँ कार्यकारी–निर्देशक प्रतिस्पर्धाका आधारमा चयन गर्ने कुरा प्रधानमन्त्री केपी शर्मा ओलीले बताउँदै आएका थिए । तत्कालीन मन्त्री गोकर्ण विष्टले प्राधिकरणको कार्यकारी–निर्देशक प्रतिस्पर्धाका आधारमा छनोट गर्ने विधि बसालेपछि त्यसयता प्रतिस्पर्धाकै आधारमा हुँदै आएको थियो । तर, वर्तमान सरकारले प्रतिस्पर्धाकै आधारमा कार्यकारी निर्देशक चयन गर्ने बताए पनि शाक्यलाई भने बिना प्रतिस्पर्धा नै नियुक्त गरिएको छ ।
तत्कालीन मन्त्री विष्टले प्राधिकरणलाई अझ क्षमतावान् र समृद्ध बनाउन कार्यकारी–निर्देशक प्रतिस्पर्धाका आधारमा चयन गर्न थालेका थिए । विष्टले दीपेन्द्रनाथ शर्मालाई प्रतिस्पर्धाकै आधारमा चयन गरेका थिए । शर्माको अवधि सकिएपछि रामेश्वर यादव कार्यकारी–निर्देशक भएका थिए । उनीसँगै मुकेश काफ्लेले पनि प्रतिस्पर्धा गरेका थिए र उनी वैकल्पिक सूचीमा रहेका थिए । पछि यादव ट्रान्सफर काण्डमा फसे । सो काण्डमा फसेपछि उनलाई अख्तियार दुरुपयोग अनुसन्धान आयोगले कारबाही गरेपछि काफ्ले कार्यकारी–निर्देशक नियुक्त भएका थिए । त्यसपछि घिसिङले पनि प्रतिस्पर्धाकै आधारमा नियुक्ति पाएका थिए ।
ऊर्जा, सिँचाइ तथा जलस्रोत मन्त्रालयले पनि प्राधिकरणको कार्यकारी–निर्देशक प्रतिस्पर्धाका आधारमा गर्ने भनी कार्यविधि बनाएर त्यहीअनुरूप नियुक्ति गर्दै आएको थियो । तर, अहिले शाक्यलाई नियुक्त गर्दा भने कार्यविधिलाई मिचेर बिनाप्रतिस्पर्धा नै नियुक्ति गर्ने काम गरिएको छ । यसबाट वर्तमान सरकार कार्यविधिलाई मिचेर जस्तोसुकै नियुक्ति गर्न पनि उद्यत् रहेको प्रस्ट देखिएको छ ।