२४ कार्तिक २०७८, बुधबार ०२:५१ बुधवार साप्ताहिक, नयाँबानेश्वर, काठमाण्डौं

भारतको सुरक्षा सम्मेलन, रसिया र इरानसहित सात राष्ट्र सहभागी

नयाँ दिल्ली । भारतले आज (नोभेम्बर १०) गर्न लागेको दिल्ली क्षेत्रीय सुरक्षा सम्वादमा प्रमुख राष्ट्रहरु रसिया, इरान, ताजिकिस्तान, काजकास्तान, उजवेकिस्तान, तुर्कमिनिस्तान र कार्जेस्तानका सुरक्षा अधिकारी (प्रतिनिधि) हरु सहभागी हुदैछन् ।

स्रोतका अनुसार यो बैठक क्षेत्रीय सुरक्षा संवेदनशिलतामा केन्द्रित हुनेछ । अफगानिस्तानमा तालीवानीहरुले सत्ता लिएपछि उत्पन्न चुनौतीहरु, विशेषगरि, सिमाभित्र वाहिर पर्यटन क्षेत्रमा पर्ने प्रभाव, कट्टरतावाद र अतिवादको प्रभाव, सिमापार गतिविधि, लागुऔषध उत्पादन र प्रयोग, हातहतियारको सम्भावित उपयोगआदिका बारेमा छलफल हुने बताइएको छ ।

सो बैठकमा भारतीय प्रधानमन्त्री नरेन्द्र मोदी पनि जोडिने सहभागी उच्च सुरक्षा अधिकारीहरुको अपेक्षा रहेको संचारमाध्यमहरुले जनाएका छन् ।

बैठकमा सहभागी केहि प्रतिनिधिहरुले अमृतसार र आग्राको दृष्यावलोकन गर्ने पनि बताइएको छ । बैठकमा बहुपक्षीय विषयहरु बाहेक द्धिपक्षीय बैठक तथा छलफलहरु पनि हुने बताइएको छ ।

भारतीय विदेश मन्त्रालयका अनुसार, उच्च तहको यो संवादले अफगानिस्तानको नयाँ विकसित घटनाक्रमपछिको समग्र सुरक्षा अवस्थाको समिक्षा गर्नेछ । ‘परम्परादेखि नै भारतको अफगानिस्तानका जनतासँग घनिष्ठ र मित्रवत् सम्वन्ध रहदै आएको छ, त्यसैले अफगानिस्तानले भोगिरहेको सुरक्षा र मानवीय चुनौतीहरुलाई अन्तर्राष्ट्रियरुपमा सम्बोधन गर्नुपर्ने बताउँदै आएको छ । यो बैठक सोही दिशातर्फको कदम हो’, विदेश मन्त्रालयले भनेको छ ।

यसैविच, चीन र पाकिस्तानले भने समय तालिका नमिलेको भन्दै सो बैठकमा सहभागी नहुने बताइसकेका छन् ।