३२ श्रावण २०७४, बुधबार ०५:२५ बुधवार साप्ताहिक, नयाँबानेश्वर, काठमाण्डौं

पेट्रोलियम व्ययवसायीको पक्षमा माननीय

काठमाडौं । जनताको पक्षमा काम गर्ने शपथ खाएर आएका जनप्रतिनिधिहरू व्यवसायीको पक्षमा उभिएपछि आलोचनाको सिकार हुनुपरेको छ । पेट्रोलियम व्यवसायीहरूले सांसद र आपूर्ति मन्त्रालयका सचिवलाई थर्काएपछि नेपाल सांसदहरूकै सिफारिसमा आयल निगमले व्यवसायीको क्षतिपूर्ति बढाएको छ ।
संसद्को उपभोक्त हित सम्बन्ध उपसमितिका संयोजक सुभाषचन्द्र ठकुरीलगायतका व्यक्तिहरू पछिल्लो समय व्यवसायीको पक्षमा उभिएका हुन् । बिहीबार साँझ बसेको संसद्को उपभोक्ता हित सम्बन्ध उपसमितिमा पेट्रोलियम डिलर्स एसोसियसन र ढुवानी व्यवसायीले सांसद र आपूर्ति सचिवलाई थर्काएका थिए । सांसद सुभाषचन्द्र ठकुरीको संयोजकत्वमा गठित उक्त समितिका सबै सदस्यहरूलाई व्यवसायीहरूले पहिले नै प्रभावमा पारिसकेकाले त्यसरी थर्काउने हैसियत राखेको र सबै मिडियाका सामु हप्काइदिएको बुझिएको छ ।
ढुवानी व्यवसायी महासंघका महासचिव विश्व अर्यालले क्षतिपूर्ति वृद्धि नगरेसम्म प्रधानमन्त्रीले भने पनि इन्धन नउठाउने घोषणा गरेका थिए । सभापतिको आसनमा बसेका सांसद ठकुरीले व्यवसायीको चुनौतीलाई कुनै जवाफ दिन सकेनन् ।
उपसमितिले शुक्रबारदेखि इन्धन उठाउन व्यवसायीलाई आग्रह गरेको थियो भने १५ दिनभित्र दीर्घकालीन समाधानको बाटो निकाल्न आपूर्ति मन्त्रालयलाई निर्देशन दिएको थियो । तर व्यवसायीले समितिमै निर्देशन नमान्ने धम्की दिएका थिए ।