१५ श्रावण २०७१, बिहीबार ०८:०५ बुधवार साप्ताहिक, नयाँबानेश्वर, काठमाण्डौं

सभासद्ले मर्यादा ख्याल नगर्दा सभामुख हैरान

काठमाडौं । व्यवस्थापिका–संसद्को सोमबारको बैठकमा सभामुख सुवास नेम्वाङले बारम्बार सभासद्हरूलाई एउटै कुरामा रुलिङ गरिरहनुपर्‍यो । एक जना सभासद् बोलिरहेका बेला अगाडिबाट बाटो काट्दै भित्र–बाहिर गर्नेहरूलाई ‘पछाडि फर्केर हिँड्नुस्’ भन्दैमा सभामुख हैरान हुनुभयो ।
केही क्षण आरामका लागि आफ्नो कक्षतिर आउनुभएका सभामुख नेम्वाङले अनौपचारिक कुराकानीका क्रममा भन्नुभयो– ‘झलनाथ कमरेड सधैं त्यही ढोका प्रयोग गर्नुहुन्थ्यो, आज उहाँ पनि पछाडि फर्कनेमा पर्नुभयो भन्ने लागेको थियो, धन्न जोगिनुभयो ।’ एमाले सभासद् राजेन्द्र पाण्डे बोल्दै गर्दा कांग्रेसका सभासद् अर्जुननरसिंह केसी अगाडिबाट फटाफट प्रवेश गरे । सभामुखले उनलाई रोकेर पछाडितिर नपठाउँदै कांग्रेसका अर्का सभासद् अर्जुन जोशी पनि सभामुखको फेला परे । त्यसपछि सदनमा विषय अर्कैतिर मोडियो । ढुंगा, गिटी र बालुवा झिक्न नपाइने गृह मन्त्रालयको परिपत्रले विकासका सम्पूर्ण काम ठप्प पारेको विषय उठान गरिरहेका पाण्डेले भने– ‘बाटो काट्दा–काट्दै मेरो त समय नै सकिएला जस्तो भयो ।’ सभामुखले हाँसो गर्नुभयो– ‘माननीयले ग्रहदशा देखाउनुपर्ला जस्तो छ ।’
यतिले मात्र बाटो काट्ने क्रम रोकिएन । अरू त अरू अघिल्लो संविधानसभामा एमालेको प्रमुख सचेतक भइसकेका भीम आचार्यलाई पनि सभामुखले फर्काउनुभयो । हाल पर्यटन मन्त्रीसमेत रहेका आचार्यलाई फर्काउँदा सभासद्हरूले हाँसो रोक्न किन सक्थे र † विषय समयमा बोल्नेक्रममा जनमोर्चाका सभासद् चित्रबहादुर केसीले यही विषय उठाए । ‘बाटो काटेका कारण मन्त्रीलाई समेत फर्काउनुपरेको छ । संसद्मा अनुशासनको ‘पिरियड’ राखेर एक पटक सभामुखले ‘क्लास दिनुपर्‍यो’– केसीको भनाइ थियो ।
मर्यादापालक दंग
बैठकस्थलको सुरक्षा घेरामा बस्ने मार्यादापालक सोमबार सबैभन्दा खुसी देखिन्थे । उक्त बैठकमा केही सभासद्ले मर्यादापालकको सेवा, सुविधाबारे आवाज उठाएका थिए । कर्मचारी र मर्यादापालकलाई दिइने भत्तामा विभेद गरिएको भन्दै त्यसलाई समान गर्नुपर्ने माग केही सभासद्हरूको थियो । यो विषय सुरुदेखि नै उठिसकेकाले पहलकदमी पनि भइरहेको जवाफ सभामुखले सदनलाई दिनुभएको थियो । यता, संसद् सचिवालयका कर्मचारीहरू पनि सम्मेलन केन्द्रका कर्मचारीलाई आफूसरह सेवा सुविधा दिएकोमा सन्तुष्ट छैनन् । संसद्का कर्मचारीले ८५ र केन्द्रका कर्मचारीले ८० प्रतिशत भत्ता पाउँछन् । सम्मेलन केन्द्रका कर्मचारीहरूले ८५ प्रतिशत नै पाउनुपर्ने माग राख्दै आएका छन् भने अर्कातिर दिइँदै आएको ८० प्रतिशत पनि नाजायज भएको सचिवालय कर्मचारीको दाबी छ । सचिवालयका एक उच्च कर्मचारीले भने– ‘हामी रात दिन बस्नुपर्छ, उनीहरू १०–५ ड्युटी गर्छन्, अनि कसरी भत्ता बराबर हुन्छ ?’ त्यति मात्र होइन, सचिवालयले मासिक झन्डै १ करोड भाडा केन्द्रलाई तिरेपछि आफ्ना कर्मचारीलाई कति तलब–भत्ता दिने भन्ने कुरा केन्द्रले जान्ने कुरा भएको बताइन्छ । केन्द्रमा झन्डै ९० कर्मचारी छन् भने सचिवालयका करिब २० कर्मचारी त्यहाँ खटिएका छन् ।
त्यसो त काममा पनि आफूहरू पेलाइमा परेको गुनासो सचिवालयका कर्मचारीहरूको छ । ‘सचिवालयका सुब्बा, अधिकृतहरू सबै किताब–पुस्तिक बाँड्न खटिएका हुन्छन् तर केन्द्रका चाहिँ पियन पनि हात बाँधेर बस्छन् ।’
किचेनदेखि गाजासम्मका कुरा
सोमबारको बैठकमा सभासद्हरूले घरको किचनदेखि प्यालेस्टाइनको गाँजा क्षेत्रसम्मको कुरा उठाए । प्राय: गाउँघरका बोलीचालीका ठेट शब्द र उखान झिकेर रमाइलो शैलीमा बोल्ने जनमोर्चाका नेता केसीले सभासद्को शैली, आचरण र व्यवहारप्रति तिखो टिप्पणी गरे । आज म संसदको कम्पाउण्डभित्रकै दु:खेसो भन्दै कुराको थालनी गरेका केसीले भने– ‘यहाँ सभासद्लाई पढ्नका लागि लाइब्रेरीको व्यवस्था छ, केही सभासद् पढिरहेका पनि हुन्छन् तर कतिपय सभासद् आफ्नै घर–भान्सामा भएझैं हल्ला गर्छन्, फोनमा कुरा गर्दा पनि चिच्याएर बोलेका हुन्छन् ।’
एमाले सभासद् रवीन्द्र अधिकारीले द्वन्द्वग्रस्त गाँजा क्षेत्रमा भएको मानवताविरोधी घटनाका बारेमा सदनको ध्यानाकर्षण गराएका थिए । १९ दिनदेखि गाजामाथि इजरायलको एकोहोरो आक्रमण हुँदा १ हजारभन्दा बढीले ज्यान गुमाइसक्दा आफूहरू चुपचाप बसेकोप्रति अधिकारीले खेद जनाए । उनले भने– ‘नेपाल विश्वशान्तिको पक्षधर राष्ट्र हो तर हामी एक शब्द बोलेका छैनौं । त्यो बर्बर आक्रमणको घोर भत्र्सना गर्नुपर्छ ।
विशेष समयमा बोल्दै एमाओवादी सभासद् रामनारायण बिडारीले जैविक मल उत्पादनमा प्रोत्साहन दिनुको सट्टा रासायनिक मल आयात गरेर सरकार कमिसनको चक्करमा फसेको भन्दै सरकारको कडा आलोचना गरे । मधेसी जनअधिकार फोरम नेपालका उपेन्द्र यादवले कोशी बाढी पीडितका आवाज उठाए । ६ वर्षअघि कोसी बाढीबाट विस्थापितलाई पुनर्वासको नाममा सरकारले काठ दिने भने त्यो काठ विहारका जनताले पाएको तर पीडितलेअ झै नपाएको यादवको भनाइ थियो । कांग्रेस सभासद् डा. प्रकाशशरण महतले ऊर्जा सम्झौता नगरेर गल्ती गरेको बताए । कांग्रेसकै अर्का सभासद् धनराज गुरुङले शून्य समयमा बोल्दै आफ्नो घरमा तरकारी पाक्न छाडेको बताएका थिए । उनले भने– ‘विषादीका कारण मेरो घरमा तरकारी पाक्नै छाडेको छ, सायद अरुको घरको हालत पनि यस्तै होला ।’