२८ फाल्गुन २०७०, बुधबार ०८:१८ बुधवार साप्ताहिक, नयाँबानेश्वर, काठमाण्डौं

लाभको वर्ष

०३३ मेरो जीवनमा धेरै दृष्टिकोणहरू राम्रो रह्यो । राजनीतिक, सामाजिक र व्यक्तिगत जीवनमा मन पर्ने घटनाहरू भएका थिए । केही दिनपछि बीपी कोइराला, गणेशमान सिंह र शैलजा आचार्य पटनाबाट काठमाडौं आए । बीपी कोइरालालाई विमानस्थलमा पक्राउ गरेर मुद्दाहरू चलाइने समाचार त्यसै दिन विराटनगरमा सुनियो । बीपी कोइराला स्वदेश फर्केको कुरा नेपालको प्रजातान्त्रिक आन्दोलनले सही मोड लिने ठूलो आशा भयो ।
मैले सर्वोच्च अदालतबाट अधिवक्ताको प्रमाणपत्र लिई कानुन व्यवसाय पनि थालेकाले आम्दानी पनि राम्रै बृद्धि हुन थालेको थियो । मेरो छोरा स–साना केटाकेटी पढ्न जेसी बाल सदनको पढाइ सकेर आदर्श विद्यालयमा भर्ना भएको थियो र दार्जिलिङ माउन्ट हर्मन स्कुलमा भर्ना गर्ने तरखर सुरु थियो । ०३३ मै मेरो छोरीको पनि जन्म भएको थियो । त्यसअघि छोराभन्दा मुनि एउटा छोरी समय नपुगी जन्मेर केही घन्टामै मृत्यु भएकाले एउटा उदास अनुभव म र मेरो पत्नीको जीवनमा थियो । त्यसैले छोरी नै  जन्मेकोमा ठूलो मानसिक सन्तुष्टि पनि थियो । छिमेकी भारतमा पनि त्यसै वर्ष संकटकाल लागू गरी तानाशाहीपूर्ण शासन चलाएकोमा भारतीय जनताले ३० वर्ष निरन्तर शासनमा रहेको भारतीय कांग्रेसका उम्मेदवारहरूलाई व्यापक रूपमा चुनावमा सत्ताबाट झारिदिएका थिए । संकटकाल लागू गर्ने प्रधानमन्त्री इन्दिरा गान्धीको त जफत नै भएको थियो ।
नयाँ जनता पार्टी भारतको केन्द्रमा सरकार बनाउन सफल भएको थियो । नयाँ प्रधानमन्त्री मोरारजी देसाईले नेपालसँग राम्रो सम्बन्ध बढाउने काम थालेका थिए । उनी काठमाडौं भ्रमणमा आएका बखतको संयुक्त विज्ञप्तिमा नेपालको हित हुने जलविद्युत् योजनाहरू र दोलालघाट–धनकुटा मध्य पहाडी राजमार्ग बनाउने उल्लेख भएको थियो । यसप्रकार मेरो जीवनमा ०३३ व्यक्तिगत सामाजिक र राजनीतिक सबै रूपले सुखद मोडका अनुभवहरूको साथ थियो ।
मेरो पत्नी आदर्श बालिका विद्यालयमा शिक्षिका थिइन् । हरेक वर्ष गर्मीको छुट्टिमा उनको माइती काठमाडौं हुँदा म पनि केही दिनलाई उनको साथ आउँथे । तर, ०३३ मा भर्खर वकालत थालेको हुँदा म आएको थिइनँ । उनी र छोरामात्र आएका थिए ।
म विराटनगरमा हुँदै इन्द्रराज्यलक्ष्मी प्रसूति गृहमा छोरी जन्मेको खबर पुग्यो । बाबालाई जापानी राजदूतले दिएको महँगो रक्सी बाबालाई काम नहुँदा आमाले मलाई दिनुभएको थियो र मैले राखिरहेको थिएँ । छोरी जन्मेको खबर पाएको साँझ म भरतमोहन अधिकारी कहाँ त्यो बोतल लगेर गएँ । त्यहाँ महेशप्रसाद उपाध्याय र सुरेश अधिकारीलाई पनि बोलायौं । र, खुसियाली मनायौं ।