११ माघ २०७४, बिहीबार ०६:२६ बुधवार साप्ताहिक, नयाँबानेश्वर, काठमाण्डौं

नगर समृद्ध बनाउन अवधारणा

पालुङ । थाहा नगरपालिकालाई समृद्ध नगर बनाउने विषयमा नागरिक समाजका अगुवाहरूले आ–आफ्नो धारणा राखेका छन् । शनिबार शिखरकोटस्थित एक होटलको सभाहलमा भएको नागरिक अन्तक्र्रिया कार्यक्रममा नागरिक समाजका अगुवाहरूले नगरको विविध विषयमा आआफ्नो धारणा राखेका हुन् ।
कार्यक्रममा विभिन्न क्षेत्रमा अगुवाइ गर्दै आएका नौ जनाले आआफ्नो अवधारणा पत्र नै प्रस्तुत गरेका थिए । कार्यक्रममा थाहानगरको समग्र विकास, शिक्षा, पर्यटन, धार्मिक पर्यटन, उपभोक्ता हित, साहित्य, सञ्चारलगायतको विकासका सन्दर्भमा कार्यपत्र र अवधारणा पत्र प्रस्तुत गरिएको थियो । कार्यक्रममा नगरपालिकाको समग्र विकासलाई लिएर समृद्ध थाहानगर निर्माणका आधारहरू शीर्षकमा अच्यूतमप्रसाद ढकाल, थाहा नगरपालिकाको शिक्षा विकाससम्बन्धी सानोभाइ कार्की, पर्यटन व्यवसाय विकासबारे सुरेन्द्रमान प्रधानले अवधारणा पत्र प्रस्तुत गरेका थिए ।
त्यसैगरी, धार्मिक पर्यटन विकाससम्बन्धी रामप्रसाद ढकालले अवधारणापत्र प्रस्तुत गरेका थिए भने स्थानीय सरकारलाई बलियो बनाउन सञ्चारमाध्यमको भूमिकाको सन्दर्भमा नगरपालिकाका कर्मचारी तथा स्थानीय पत्रकार सुरजकुमार भुजेलको अवधारणापत्र प्रस्तुत गरिएको थियो । थाहा नगरको महिला विकाससम्बन्धी कल्पना बलामी, साहित्य, भाषा र कलासम्बन्धी बिर्खे अञ्जान र उपभोक्ता हितसम्बन्धी गणेशमान श्रेष्ठले अवधारणापत्र प्रस्तुत गरेका थिए । प्रस्तुत अवधारणापत्रमाथि क्षेत्रीय शिक्षा निर्देशनालय हेटौंडाका उपनिर्देशक कृष्ण घिमिरे र ज्योति रायमाझीले टिप्पणी गरेका थिए ।
टिप्पणीकारहरूले अवधारणा पत्रहरू ओजपूर्ण रहेको भन्दै त्यससम्बन्धी टिप्पणी गरेका थिए । थाहा नगरलाई समृद्ध बनाउन नगरको बार्षिक बजेट, योजना र कार्यक्रमले मात्र सम्भव नभई दिगो विकासमा आधारित आवधिक योजना र तदनुरुपको कार्यान्वयनलाई जोड दिनुपर्नेमा अवधारणा पत्रहरू सार्वजनिक भएको थियो ।
नगरको आन्तरिक श्रोतहरूको वृद्धि गर्दै बाह्य क्षेत्रबाट लगानी भित्र्याउन डिपिआरसहितको खाका अघि सार्नुपर्नेमा सहभागी सबैले जोड दिएका थिए । अवधारणाकारहरूले नगरबासीको साथ, सहयोग र जनप्रतिनिधिहरूको अगुवाइका साथ योजनाबद्ध ढंगले अघि बढ्नुपर्नेमा जोड दिएका थिए ।