१४ फाल्गुन २०८०, सोमबार १२:१४ बुधवार साप्ताहिक, नयाँबानेश्वर, काठमाण्डौं

राष्ट्रिय सभा अध्यक्ष माओवादीकै हुन्छ : जनार्दन शर्मा

१४ फागुन, काठमाडौं । नेकपा (माओवादी केन्द्र) का सांसद जनार्दन शर्माले राष्ट्रिय सभाको अध्यक्ष आफ्नो पार्टीकै हुने बताएका छन् । आज (सोमबार) प्रतिनिधि सभा बैठकपछि सञ्चारकर्मीहरूसँग कुराकानी गर्दै उनले राष्ट्रिय सभाको ठूलो दलको हिसाबले अध्यक्षमा आफ्नो पार्टीको दाबी रहेको बताए ।

उनले हालसम्म गठबन्धन दलहरूका बिचमा अध्यक्ष पद कसलाई दिने भन्नेमा सहमती नभएको स्पष्ट पारे । ‘राष्ट्रिय सभाको सबभन्दा ठूलो दल हाम्रो हो । उसले दाबी नगरे कसले गर्छ ? संस्थागत रूपमा कसैको पनि सहमति भएको छैन । संस्थागत सहमति भएको छैन,’ उनले भने, ‘ठूलो दलले दाबी नगरेमा कसले गर्ने ? भोलि सरकारको आलोपालो होला । त्यतिबेला हामी त संसदमा पनि हुँदैनौं । सरकारमा पनि हुँदैनौं । सबैतिर शून्य हुन्छ । त्यो हाम्रै हुन्छ ।’

उनले नेपाली कांग्रेसले महासमिति बैठकबाट आगामी निर्वाचनमा गठबन्धन नगर्ने निर्णय गरेको बारेमा पार्टीको स्थायी समिति बैठकमा छलफल हुने पनि बताए । उनले कांग्रेस महासमिति बैठकमा जनयुद्ध लगायतका कतिपय विषयमा प्रश्न गरेका हुनाले त्यसमा आफूहरूको आपत्ति रहेको बताए ।