२९ जेष्ठ २०७६, बुधबार ०५:४२ बुधवार साप्ताहिक, नयाँबानेश्वर, काठमाण्डौं

भक्तपुरबाट प्रधानमन्त्री रोजगार कार्यक्रमको शुभारम्भ

काठमाडौं । प्रधानमन्त्री केपी शर्मा ओलीले गत शुक्रबार ‘प्रधानमन्त्री रोजगार कार्यक्रमको शुभारम्भ गरेका छन् । सूर्यविनायकबाट कटुन्जे–तीनधारा सडक निर्माण सुरु गरेर प्रधानमन्त्री ओलीले रोजगार कार्यक्रम सुरु गरेका छन् । सो सडक सांसद महेस बस्नेत र सूर्यविनायक नगरपालिकाका प्रमुख वासुदेव थापाको विशेष पहलमा सुरु भएको हो ।
भक्तपुरमा ‘प्रधानमन्त्री रोजगार कार्यक्रम’को शुभारम्भ गर्दै प्रधानमन्त्री ओलीले अब सरकारले बेरोजगारलाई घरैमा पुगेर रोजगारी दिने आश्वासन दिए । प्रधानमन्त्री ओलीले ४० लाख नेपाली युवालाई आफ्नो नेतृत्वको सरकारले विदेश नपठाएको भन्दै उनीहरूलाई स्वदेशमै रोजगारी दिने वातावरण बनाइरहेको दाबी गरे । सरकारले भ्रष्टाचार नगरीकन काम गरिरहेको दाबी गर्दै काममा मात्र विश्वास गर्ने प्रधानमन्त्री ओलीले बताए । उनले यसअघिको सरकारले राम्रो काम नगरेको र अहिलेको सरकारले राम्रो कामहरूको सुरुवात गर्दा विपक्षीले विरोध र डाह गरिरहेको समेत उनले बताए ।
श्रम रोजगार तथा सामाजिक सुरक्षामन्त्री गोकर्ण विष्टले सरकारले भने अनुसार ५ लाख युवालाई जसरी पनि रोजगारी दिने दाबी गरे । उनले अहिले भक्तपुरमा ७ सयजनालाई आंशिक रूपमा रोजगारी दिइएको बताएका छन् । भक्तपुरका चारवटै नगरपालिकाको संयुक्त आयोजनामा ‘कामका लागि पारिश्रमिक’मा आधारित सामुदायिक आयोजना कार्यान्वयनको बिहीबार शुभारम्भ भएको हो । कार्यक्रमका लागि भक्तपुरका चारवटै नगरपालिकामा २ करोड ४६ लाख रुपैयाँ छुट्ट्याएको छ । सूर्यविनायक नगरपालिकाबाट ४ सय, चाँगुनारायण नगरपालिकाबाट ९ सय १० र मध्यपुर थिमि नगरपालिकाबाट ७६ जनाले रोजगारीका लागि आवेदन दिएका छन् ।