३१ भाद्र २०७७, बुधबार ०५:०४ बुधवार साप्ताहिक, नयाँबानेश्वर, काठमाण्डौं

ताराबहादुरको तारिफयोग्य अगुवाइ

काठमाडौं । समाजसेवी ताराबहादुर कुँवरले शनिबारसम्ममा १२ सय ४८ जनालाई राहत बाँडेका छन् । कोरोना भाइरसका कारण भएको लकडाउन र निषेधाज्ञामा मानिसको जनजीवन असहज भएको भन्दै उनले समाजको गरिखाने वर्गलाई राहत बाँडेका हुन् । उनको यो सामाजिक काम तारिफयोग्य भएको भन्दै सर्वत्र प्रशंसा गरिएको छ ।
शनिबार उनले आफ्नै कार्यालय बाफलमा काठमाडौं महानगरपालिकाकीउपप्रमुख हरिप्रभा खड्गीको प्रमुख आतिथ्यमा १ सय ३ जनालाई राहतस्वरूप चामल, दाल, तेल, नुनलगायतका सामग्री वितरण गरेकाहुन् । समाजमा चर्चा कमाउन आफुले यो काम नगरेको उनको भनाइ छ । आफू पनि दुख गरेर आएको हुनाले समाजका तल्लो वर्गको दुःखमा साथ दिन पाउँदा आफूलाई सन्तोष मिल्ने उनी बताउँछन् ।
उनी चक्रपथ सफाइ अभियानका प्रमुख अभियन्ता पनि हुन् । उनले पछिल्लो समयमा रक्तदान अयिभानसमेत चलाएका छन् । उनले दुई सातासम्ममा ५२ पाउन्ड रगत संकलन गरेका छन् । उनले पहिलो हप्तामा २४ र दोस्रो हप्तामा २८ पाउण्ड रगत संकलन गरेर नेपाल रेडक्रस सोसाइटी केन्द्रीय कार्यालयलाई बुझाइसकेका छन् । उनी रक्तदान अभियान निरन्तर सञ्चालन गरिरहने बताउँछन् । उनी आफ्ना तर्फबाट कसैको लागि हित हुन्छ भने सानोतिनो खर्च भयो भनेर वास्ता गर्न नहुने बताउँछन् । ‘एउटा मानिसलाई दुःख पर्दा अर्को मानिस चुपचाप बस्न मिल्दैन भनेर आफूसँग भए पनि नभए पनि उदार मनले राहत बाँडेको हुँ,’ उनले भने । उनी नेपाल हेभी इक्विपमेन्ट व्यवसायी महासंघका अध्यक्ष, हजुरलाई नमस्ते ट्रेड लिंकका सञ्चालक हुन् । उनले लकडाउनमा समस्या परेको भन्दै आफूले लगाएको घरभाडामा पनि छुट गरिदिएका थिए ।