२९ पुष २०७७, बुधबार ०४:४२ बुधवार साप्ताहिक, नयाँबानेश्वर, काठमाण्डौं

ईश्वरलाई जता गयो त्यतै कालो झन्डा

काठमाडौं । केपी ओलीलाई पटकपटक उक्साएर पार्टी विभाजनको यो स्थितिसम्म पु¥याउन महत्वपूर्ण भूमिका खेल्दै आएका धुर्त नेता ईश्वर पोखरेललाई कार्यकर्ताहरूले जता गयो त्यतै कालो झन्डा देखाउन सुरु गरेका छन् ।
विगतमा पनि तत्कालीन एमाले र माओवादी केन्द्रबीच एकता हुँदा आफ्नो भूमिका साँघुरिन्छ भनेर एकतामा भाँजो हाल्न लगातार लागेका उनी विभाजनपछि एक कदम माथि उठेर सहकर्मी नेताविरुद्ध विष वमनमा लागेका छन् । उनको यस्तो असह्य कदम र नयाँ जोगीले बढी खरानी घसेजस्तो भूमिका भएपछि अचेल उनलाइ हरेक दिन कालो झन्डाले स्वागत हुन थालेको छ । आइतबार सिन्धुपाल्चोकमा कालो झन्डा बेहोरेका उनलाई मंगलबार पनि सर्लाहीका सयौं कार्यकर्ताले सडकमा बसेर कालो झन्डा प्रदर्शन गरेका छन् । नेकपा नेता रेवती पन्तको अगुवाइमा अखिल नेता आरती लामालगायतको समूहले पोखरेलविरुद्ध कालो झन्डा प्रदर्शन गरेको हो । उनीहरूले मन्त्री पोखरेललाई असंवैधानिक कदमको मतियार भन्दै सयौंका संख्याका कार्यकर्ताले कालो झन्डा प्रदर्शन गरेका हुन् । यसअघि खानेपानीमन्त्री मणिचन्द्र थापालाई पनि जाजरकोटमा स्थानीय कार्यकर्ताले कालो झन्डा प्रदर्शन गरेका थिए ।