सचिव सरुवामा व्यापक असन्तुष्टि
काठमाडौं । प्रधानमन्त्री तथा मन्त्रिपरिषद् कार्यालयका अधिकारीले नै सरकारले सचिव सरुवाको कुनै मापदण्ड बनाउन नसकेको र सोर्सफोर्सका आधारमा हचुवामा सचिवको सरुवा गरेको भन्दै असन्तुष्टि व्यक्त गरेका छन् । उनीहरूले मनोमानी रूपमा गरिने सचिव सरुवाले प्रशासन क्षेत्रको विकासमा गम्भीर धक्का लाग्न सक्ने भन्दै चिन्ता व्यक्त गरेका छन् । सरकारले एकैपटक १६ सचिवको सरुवा गरेको थियो । मन्त्रिपरिषद्को बिहीबार बसेको बैठकले विभिन्न मन्त्रालय, आयोग, प्रदेश तथा कार्यालयमा कार्यरत सचिवको सरुवा गरेको हो ।
निर्वाचन आयोगका सचिव देवकुमारी गुरागाईंको उपराष्ट्रपतिको कार्यालयमा सरुवा भएको छ । उपराष्ट्रपति कार्यालयका सचिव केदार न्यौपाने युवा तथा खेलकुद मन्त्रालयमा सारिएका छन् । अख्तियार दुरुपयोग अनुसन्धान आयोगका सचिव सुरेश अधिकारी निर्वाचन आयोगमा तथा श्रम, रोजगार तथा सामाजिक सुरक्षा मन्त्रालयका सचिव तोयम रायलाई अख्तियारमा पठाइएको छ । राष्ट्रिय पुनर्निर्माण प्राधिकरणका सचिव सुरेश आचार्य नेपाल ट्रस्टको कार्यालयमा सरुवा भएका छन् भने राष्ट्रिय सतर्कता केन्द्रका सचिव मणिराम गेलाल राष्ट्रिय पुनर्निर्माण प्राधिकरणमा पुगेका छन् । नेपाल ट्रस्टका देवेन्द्र कार्कीको राष्ट्रिय सतर्कता केन्द्रमा सरुवा भएको छ । युवा तथा खेलकुद मन्त्रालयका सचिव रामप्रसाद थपलिया शिक्षा, विज्ञान तथा प्रविधि मन्त्रालयमा र शिक्षा सचिव गोपीनाथ मैनाली राष्ट्रिय प्राकृतिक स्रोत तथा वित्त आयोगमा सरुवा भएका छन् ।
यस्तै, सोही आयोगका सचिव बेगेन्द्रराज शर्मा पौड्यालको भूमि व्यवस्था, सहकारी तथा गरिबी निवारण मन्त्रालयमा सरुवा भएको छ । भूमि मन्त्रालयका सचिव टेकनारायण पाण्डेलाई सार्वजनिक खरिद अनुगमन कार्यालय सारिएको छ । सार्वजनिक खरिद अनुगमन कार्यालयका सचिव सूर्यप्रसाद गौतमको श्रम, रोजगार तथा सामाजिक सुरक्षा मन्त्रालयमा सरुवा भएको छ । लोकसेवा आयोगका सचिव अर्जुन पोखरेल उद्योग, वाणिज्य तथा आपूर्ति मन्त्रालयमा पठाइएका छन् । आयोगमा प्रधानमन्त्री तथा मन्त्रिपरिषद् कार्यालयका सचिव महेन्द्र गुरागाईं सरुवा भएका छन् । वाणिज्य सचिव बैकुण्ठ अर्यालको भने प्रधानमन्त्री तथा मन्त्रिपरिषद्को कार्यालयमा सरुवा भएको छ । प्रदेश १ का प्रमुख सचिव दिनेश भट्टराईलाई उद्योग सचिवमा ल्याइएको छ भने भट्टराईको ठाउँमा भर्खरै बढुवा भएर प्रधानमन्त्री तथा मन्त्रिपरिषद्को कार्यालयमा अतिरिक्त रूपमा रहेका सचिव सुमन अर्याललाई पठाइएको छ । बिहीबार बसेको मन्त्रिपरिषद् बैठकले १७ जना सचिवको सरुवा गरे पनि विवाद र असन्तुष्टिका कारण सरकारले सरुवा सूची सार्वजनिक गर्न सकेको थिएन । शिक्षा विज्ञान तथा प्रविधि मन्त्रालयका सचिव गोपीनाथ मैनालीले आफूलाई अन्यायपूर्ण रूपमा मनोबल गिराउनेगरी सरुवा गरिएको भन्दै सरुवा नसच्याए राजीनामा दिने चेतावनी दिएको बुझिएको छ । सुरुमा मैनालीको सरुवा सार्वजनिक खरिद अनुगमन कार्यालयमा भएको थियो तर मैनालीले आपत्ति व्यक्त गरेपछि उनको सरुवा निर्णयलाई होल्ड गरिएको प्रधानमन्त्री तथा मन्त्रिपरिषद् कार्यालय स्रोतले जानकारी दिएको छ । मैनाली तुलनात्मक रूपमा इमानदार सचिवका रूपमा परिचित छन् । इमानदार सचिवको हुर्मत लिन खोजेको भन्दै सरकारको आलोचनासमेत भएको छ । सोमबार प्रधानमन्त्री तथा मन्त्रिपरिषद् कार्यालयले गत बिहीबार भएका सचिवको सरुवाको पत्र केही सचिवलाई थमाएको भए पनि केहीले भने पत्र बुझ्न नमानेको बुझिएको छ ।
सम्बन्धित समाचार
- फर्जी हाजिरी गरेर १ लाख तलबभत्ता लिने चार शिक्षकविरुद्ध भ्रष्टाचार मुद्दा
- काठमाडौं महानगरका तीन कर्मचारी निलम्वनमा
- भूकम्पबाट घाइते भएकाहरुकाे नि:शुल्क उपचार गर्ने मन्त्रिपरिषदको निर्णय
- शिक्षक रुपेश सर्राफ हत्यामा संलग्न ५ जना सार्वजनिक
- बारामा प्रिन्सिपलको हत्या प्रेमिकाकै ब्वाइफ्रेण्डबाट
- खाद्य व्यवस्थाले आजदेखि खसी, बोका र च्याङ्ग्रा बिक्री गर्ने
- सरकार र आन्दोलनरत शिक्षकबीच वार्तामा जुटेन सहमति
- देशभरका शिक्षक कर्मचारीहरू आजदेखि काठमाडौंमा सडक आन्दोलन गर्दै
- आज राष्ट्रिय विज्ञान दिवस
- नेम्वाङको निधनले मर्माहत भएँ : प्रधानमन्त्री
- खार्तूममा हवाई आक्रमण, २० सर्वसाधारणको मृत्यु
- गौरा पर्वका अवसरमा सुदूरपश्चिममा आज र भोलि सार्वजनिक बिदा
Leave a Reply