२९ श्रावण २०७८, शुक्रबार ०२:२८ बुधवार साप्ताहिक, नयाँबानेश्वर, काठमाण्डौं

भारत खाद्य तेलमा आत्मनिर्भर हुँदै

नयाँदिल्ली । खाद्य तेलमा आत्मनिर्भर हुने उद्देश्यले भारतले आन्तरिक तेलहन उत्पादनलाई बढावा दिन १ सय १० अर्व रुपैयाको परियोजना अगाडि सार्ने भएको छ । यसले ठूलो मात्रामा भएको खाद्य शाकाहारी तेलको आयात व्यापारलाई बिस्थापन गर्ने प्रधानमन्त्री नरेन्द्र मोदीले बताएका छन् ।

भारत विश्वकै ठूलो खाद्य तेल आयातकर्ता मुलुक हो । भारतले बार्षिक करिव १० अर्व डलरको तेल आयत गर्दछ । भारतले इन्डोनेसिया र मलेसियाबाट पाम तेल, ब्राजिल र अर्जेन्टिनाबाट सोयल तथा रुस र युक्रेनबाट सनफ्लावर तेल आयात गर्ने गरेको छ । भारतले चिनी, चामल जस्ता कृषि उत्पादनहरु विश्व बजारमा निर्यात गर्ने गर्छ । तर,आन्तरिक तेलहन उत्पादन भने चामल र गहुँको तुलनामा ६ गुणा कम रहेको छ ।

अब भारत सरकारले राष्ट्रिय योजना अन्र्तगत १ सय १० अर्ब रुपियाँ तेलको उन्नत बीउ, प्रविधिलगायतका चीज खरिदका लागि किसानलाई उपलब्ध गराउने प्रधानमन्त्री मोदीले ट्वीटर मार्फत जानकारी गराएका छन् ।

‘जब भारत कृषि उपज निर्यातमा विश्वमै प्रमुख देशका रुपमा उदाउँदै छ भने हामी तेलहनमा परनिर्भर हुनु हुँदैन,’ प्रधानमन्त्री मोदीले ट्वीटरमा लेखेका छन् ।