२९ बैशाख २०८३, मंगलवार ११:०३ बुधवार साप्ताहिक, नयाँबानेश्वर, काठमाण्डौं

दैनिक १६ घण्टा काम गरिरहेको छु : अर्थमन्त्री वाग्ले

काठमाडौँ । अर्थमन्त्री डा. स्वर्णिम वाग्लेले मन्त्री बनेको पहिलो ३० दिनमै आफूले करिब ३ सय निर्णय गरेको बताएका छन्।

अर्थ समितिको बैठकमा बोल्दै उनले अहिले आफू अधिकांश समय मन्त्रालयमै बिताइरहेको र दैनिक १२ देखि १६ घण्टासम्म काम गरिरहेको बताए।

“३० दिनमा ३ सय वटा निर्णय गरेको रहेछु,” वाग्लेले भने, “व्यस्तताका बीच पनि सांसदहरूको कुरा सुन्ने प्रयास गरिरहेको छु, चाहे छोटो समय उभिएरै किन नहोस्।”

उनले मन्त्रालयको कामलाई प्राथमिकता दिँदै उद्घाटन, माला-खादा, समारोह र बाहिरी कार्यक्रममा जाने क्रम लगभग बन्द गरेको पनि खुलाए।

वाग्लेको यो अभिव्यक्तिपछि सामाजिक सञ्जालमा मिश्रित प्रतिक्रिया देखिएको छ। कतिपयले ‘काम गर्ने मन्त्री’ भन्दै प्रशंसा गरेका छन् भने केहीले निर्णयको संख्या भन्दा परिणाम महत्त्वपूर्ण हुने टिप्पणी गरेका छन्।