५ जेष्ठ २०८३, मंगलवार ०९:३९ बुधवार साप्ताहिक, नयाँबानेश्वर, काठमाण्डौं

जलवायु र खाद्य सुरक्षामा महिलाको भूमिका केन्द्रित विश्व सम्मेलन काठमाडौंमा

काठमाडौं । मे २६ देखि २९ सम्म काठमाडौंमा विश्वका पशुपालक तथा राञ्चिङ समुदायका महिलाहरूको विशेष अन्तर्राष्ट्रिय सम्मेलन आयोजना हुने भएको छ । अन्तर्राष्ट्रिय एकीकृत पर्वतीय विकास केन्द्र (इसिमोड) को मुख्य आयोजनामा हुन लागेको यो कार्यक्रम “अन्तर्राष्ट्रिय घाँसेमैदान तथा पशुपालक वर्ष २०२६” अन्तर्गतको महत्वपूर्ण विश्वस्तरीय कार्यक्रम मानिएको छ ।

“मेरा प्लस १६” नाम दिइएको उक्त सम्मेलनमा विश्वका ४० देशबाट पशुपालन तथा घाँसेमैदान व्यवस्थापनसँग जोडिएका महिलाहरू सहभागी हुनेछन् । कार्यक्रममा महिलाहरूले आफ्ना अनुभव, चुनौती, नयाँ अभ्यास तथा समाधानका उपायहरू साझा गर्नेछन् । साथै अन्तर्राष्ट्रिय सहकार्य र नेटवर्क विस्तारमा पनि जोड दिइने आयोजकले बताएका छन् ।

आयोजकका अनुसार सम्मेलनको मुख्य उद्देश्य पशुपालक महिलाहरूको आवाजलाई स्थानीयदेखि अन्तर्राष्ट्रिय तहसम्म नीति निर्माण प्रक्रियामा पुर्‍याउनु हो । विशेषगरी परम्परागत ज्ञान, संस्कृति, जैविक विविधता संरक्षण तथा दिगो खाद्य प्रणालीमा महिलाहरूले खेलिरहेको भूमिकालाई विश्वसामु उजागर गरिनेछ ।

सम्मेलनको मुख्य आकर्षण “मेरा घोषणा” को पुनरावलोकन रहनेछ । सन् २०१० मा भारतको मेरा क्षेत्रमा आयोजित विश्व फोरमका क्रममा तयार गरिएको उक्त घोषणापत्रले लैङ्गिक समानता, पशुधन अधिकार तथा वातावरण संरक्षणका विषय उठाएको थियो । अहिले पनि यो दस्तावेज विश्वभरका पशुपालक महिलाहरूको आन्दोलनमा महत्वपूर्ण मानिन्छ ।

आयोजकहरूले विश्वभरका पशुपालक महिला तथा किशोरीहरू विश्व पशुपालक जनसंख्याको झण्डै आधा हिस्सा रहेको बताएका छन् । उनीहरूले व्यवस्थापन गर्ने घाँसेमैदान पृथ्वीको करिब आधा भूभागमा फैलिएको छ, जहाँ विश्वका दुईतिहाइ जैविक विविधता क्षेत्र समेटिएका छन् । साथै विश्व खाद्य आपूर्तिमा करिब १६ प्रतिशत योगदान पनि यही समुदायबाट हुने उल्लेख गरिएको छ ।

जलवायु परिवर्तन, खाद्य सुरक्षा र जैविक विविधता संरक्षणजस्ता विश्वव्यापी चुनौतीका बीच काठमाडौंमा हुन लागेको यो सम्मेलनलाई निकै महत्वपूर्ण रूपमा हेरिएको छ ।