१९ मंसिर २०७६, बिहीबार ०९:३९ बुधवार साप्ताहिक, नयाँबानेश्वर, काठमाण्डौं

थानकोट–चित्लाङ सडक छिटो सम्पन्न गर्न दबाब

काठमाडौं । थानकोट–चित्लाङ सडक अर्थात् गणेशमान मार्ग छिटोभन्दा छिटो सम्पन्न गर्न दबाब दिने उद्देश्यले सडक अनुगमन तथा जनजागरण कार्यक्रम सम्पन्न भएको छ ।
यही मंसिर ७ गते शनिबार हली नेवाः गुठी टिस्टुङ शाखाको आयोजनामा सरोकारवाला स्थानीयहरूको एक टोली आयोजना निर्माण स्थल चन्द्रागिरिमै आएर आयोजनाको कार्यप्रगति अनुगमन गरेको हो ।
उक्त जनसरोकार तथा अनुगमन कार्यक्रममा संलग्न टोली थानकोट सडक निर्माणमा ढिलासुस्ती तथा ठेकेदारको लापरबाही भएपछि तातिएको हो । २०७३ साउन ४ गते सुरु भई २०७४ कात्तिक १६ मा संम्पन्न हुनुपर्नेमा २०७५ मंसिर १६ मा म्याद थपेर पनि अझै उक्त आयोजना सम्पन्न भएको छैन । अहिलेसंम्म आयोजना सम्पन्न नगरी ठेकेदार कम्पनीले लापरबाही गरेका कारण उपभोक्तालाई निकै सास्ती परेको र करोडौंको क्षति पुगेको स्थानीयको दाबी छ । जनसरोकार टोलीले निर्माण स्थलमा एक कोणसभा आयोजनासमेत गरेको थियो । सीताराम गोपालीको सभापतित्वमा भएको कार्यक्रममा हलिं नेवा गुथीका केन्द्रीय महासचिव विनोद महर्जन, टिस्टुङ बज्रबाराही नेवाः पुचका अध्यक्ष हरिगोपाल श्रेष्ठलगायत स्थानीय समाजसेवी, बुद्धिजीवी तथा नागरिक समाजको उल्लेख्य उपस्थिति थियो ।