७ माघ २०७७, बुधबार ०५:१५ बुधवार साप्ताहिक, नयाँबानेश्वर, काठमाण्डौं

भूतपूर्व विद्यार्थीद्वारा तीन थान कम्प्युटर सहयोग

पालुङ । सरस्वती आधारभूत विद्यालयमा सोही विद्यालयबाट २०५७ सालमा कक्षा ८ उत्तीर्ण भएका भूतपूर्व विद्यार्थीहरूले कम्प्युटर तीन थान सहयोग गरेका छन् ।
२०५७ सालको ब्याचमा उत्तीर्ण भएर जाने विद्यार्थी दिनेश कार्की विजयविक्रम श्रेष्ठ तथा विशाल ढकालको संयुक्त आर्थिक सहयोगमा विद्यालयको शैक्षिक गुणस्तर वृत्ति विकास गर्न ५१ हजार रकम बराबरको सो सहयोग गरेको हो ।
सो विद्यालयबाट निम्न माध्यमिक तह उत्तीर्ण गरेका भूतपूर्व विद्यार्थी दिनेश कार्की हाल अस्ट्रेलियामा कार्यरत छन् । उनले नेपाली सिनेमा क्षेत्र तथा केही म्युजिक भिडियोमा पनि आफ्नो कलाकारिताको योगदान दिएका छन् । त्यस्तै विजयविक्रम श्रेष्ठ रोजगारीको सिलसिलामा काठमाडौंमा एक अन्तर्राष्ट्रिय स्तरको निर्माण व्यवसायको संगठनमा कार्यरत रहेका छन् भने विशाल ढकाल हाल बेलायतमा रेस्टुरेन्ट व्यवसायमा संलग्न छन् । आफूले प्रारम्भिक तथा निम्न माध्यमिक तहसम्मको शिक्षा प्राप्त गरेको विद्यालयलाई यी भूतपूर्व विद्यार्थीहरूले हाल अध्ययनरत रहेका विद्यार्थी भाइबहिनीको उज्ज्वल भविष्यको कामना गर्दै र विद्यालयको शैक्षिक गुणस्तरमा थप अभिवृद्धि गर्ने हेतुले सहयोग गरिएको जानकारी विजय विक्रम श्रेष्ठ दिए । सो कम्प्युटर विजयविक्रम श्रेष्ठद्वारा सोही विद्यालयका प्रधानाध्यापक महेन्द्र श्रेष्ठलाई हस्तान्तरण गर्दै भविष्यमा पनि आवश्यक र सकेको सहयोग गर्ने प्रतिबद्धता जाहेर गरे । प्रधानाध्यापक महेन्द्र श्रेष्ठले आगामी दिनमा अन्य भूतपूर्व विद्यार्थीले पनि यसैगरी सहयोग गर्दै गए विद्यालयको शैक्षिक गुणस्तर अझै वृद्धि हुने जानकारी दिए ।