२८ जेष्ठ २०७१, बुधबार ०७:०४ बुधवार साप्ताहिक, नयाँबानेश्वर, काठमाण्डौं

पूर्वमै माधव नेपाल अगाडि

विराटनगर । आगामी असार १९ गतेबाट सुरु हुने नेकपा (एमाले)को महाधिवेशनको मिति नजिकिँदै जाँदा कुन नेतालाई नेतृत्वमा स्थापित गर्ने भन्ने बहस पार्टी पंक्तिमा चुलिएको छ । विचारमा सबलता र नेतृत्व युवालाई हस्तान्तरणको मुद्दा बोकेका अध्यक्षका प्रत्यासी माधव नेपाल समूह र किस्ताबन्दीमा नेतृत्व हस्तान्तरणको एजेन्डा बोकेका अर्का प्रत्यासी केपी ओली समूहबीच विकास क्षेत्रका आधारमा आफ्नो अवस्था मूल्यांकन गर्ने क्रम पनि सुरु भएको छ ।
सांगठनिक हिसाबले एमालेको पकड मानिने पूर्वाञ्चलका १६ जिल्लामध्ये पार्टीको महाधिवेशनमा १३ जिल्ला अध्यक्ष खुलेर नेपाललाई सघाउने पक्षमा उभिएका छन् भने ओलीका पक्षमा दुई जिल्ला अध्यक्ष देखिएका छन् । एक जिल्ला अध्यक्ष भने अझै खुलेका छैनन् । यतिसम्मकि, स्वयम् ओलीकै गृहजिल्ला झापाको पार्टी नेतृत्व पनि उनका विपक्षमा देखिएको छ । जिल्ला अध्यक्षहरूमा ताप्लेजुङका तिलकुमार मेयाम्बो, इलामका मणिकुमार लिम्बू, झापाका रवीन कोइराला, तेह्रथुमका तेजमान कन्दङ्वा, धनकुटाका राजेन्द्र राई, भोजपुरका प्रेम राई, मोरङका महेश रेग्मी, सुनसरीका दरिकलाल चौधरी, संखुवासभाका हेमराज घिमिरे, सोलुखुम्बुका कार्यबाहक अध्यक्ष मानवीर राई, ओखलढुंगाका मोहन श्रेष्ठ, खोटाङका कार्यबाहक अध्यक्ष बबी चाम्लिङ र सप्तरीका गोविन्द न्यौपाने नेता नेपालको पक्षमा छन् । पाँचथरका कार्यबाहक अध्यक्ष राजकुमार भण्डारी र उदयपुरका बेदप्रसाद पोखरेलले ओलीलाई सघाउने वचन दिएका छन् । त्यसमा पनि वेदप्रकाशलाई दाजु–भाइको नाता लगाउँदै महासचिव ईश्वर पोखरेलले च्यापेकाले अप्ठेरो परेको बताइरहेका छन् । सिरहाका अध्यक्ष लीलानाथ श्रेष्ठ भने अहिलेसम्म कतै खुलेका छैनन् । तर, जिल्लाको अवस्था नेपालका पक्षमा लागेका केन्द्रीय सदस्य रामचन्द्र यादवसँग मिल्ने भएकाले उनको पनि सहयोग रहने बताइन्छ ।
केपी ओलीको गृह क्षेत्र रहेको पूर्वमा नै ओली समूह कमजोर रहेको कुरा पूर्वका नेताहरू बताउँछन् । ओलीकै गृहजिल्ला झापाका अध्यक्ष रवीन कोइराला भन्छन्– ‘हाम्रो चाहना त तीन शीर्ष नेतावीच सहमति भएर सर्बसम्मत नेतृत्व होस् भन्ने हो तर दुईबीच प्रतिस्पर्धा भयो भने हामी माधव कमरेडलाई सहयोग गर्छौ ।’ मोरङका अध्यक्ष महेश रेग्मी आफूहरू इमानदारहरूको आदर्श पार्टी बनाउनेहरूको पक्षमा रहेको बताउँछन् । रेग्मीले भन्छन्– ‘विचार, निष्ठा, आदर्श खोज्ने र सिद्घान्तलाई व्यवहारमा उतार्ने नेतृत्व हाम्रो खोजी हो । आलोचना गर्नेलाई पेलेर जानेका साथै गणेश प्रवृत्तिका विरुद्घ गतिलो सन्देश यसपटक पूर्वले दिँदैछ ।’
पूर्वका सभासद्हरूमध्ये गणेश काङमाङ, रवीन कोइराला, अम्बिका खवास राजवंशी, जीवनकुमारी घिमिरे, चण्डी राई, चन्द्रबहादुर गुरुङ, मीनादेवी यादव, भीम आचार्य, रेवती भण्डारी, कृष्णकुमार राई, टीकाराम चेम्जोङ, भवानी खापुङ, जयन्ती राई, सत्यनारायण मण्डल, रामचन्द्र यादव, यज्ञराज सुनुवार, आशा यादव, मन्जुकुमारी चौधरी र पाँचकर्ण राई नेपालको पक्षमा उभिएका छन् भने अरू कतिपयले कित्ता छुट्याइसकेका छैनन् ।