१४ जेष्ठ २०७२, बिहीबार ०६:३८ बुधवार साप्ताहिक, नयाँबानेश्वर, काठमाण्डौं

भूकम्प सम्भिँदै दुबईमा नेपथ्य

दुबई । निर्धारित कार्यक्रमअनुसारै घडीको सुइले ठीक नौ बजाउँदा दुबईस्थित ‘अल नासेर लिजर ल्यान्ड’ को ‘आइस रिंक’मा नेपथ्य घन्किन सुरु भयो । ‘म हिँड्दै पुगेका थुप्रै गाउँहरूको यतिबेला अस्तित्वसमेत लोप भएको छ । त्यता पुगेका बेला मैले सुख–दु:ख साटेका गाउँलेहरू या त अब यो धर्तीमै रहेनन् या सकसको जीवन बाँचिरहेका छन् । गाउँका रोधीघरहरू भत्किएका छन् । ती गाउँहरूको स्मृतिमा म त्यतैका रोधीहरुबाट कुनै बेला संकलन गरेको यो गीत गाउन चाहन्छु’ नेपथ्यका टोली अगुवा एवं गायक अमृत गुरुङले यति भन्नासाथ गाउन सुरु गरे, ‘सरुमा रानीको आँसुको कस्सम्…’कार्यक्रमको सुरुवात नेपालमा आएको महाभूकम्पबाट ज्यान गुमाउने र भत्किएका सम्पदाहरूको स्मृतिमा भएको थियो । त्यसै कारण लगत्तैको ‘अभाव अभावै भयो’ गीतमा भत्किएका सम्पदाहरू र ‘यो जिन्दगानी’मा मानवीय भोगाइका दृश्यहरू पृष्ठभूमिमा देखाइँदा दर्शकहरू भावविह्वल बन्न पुगेका थिए । नेपथ्यको सर्वकालीक लोकप्रिय ‘जीवन हो घाम छायाँ’ गाइसकेपछि अमृत फेरि दर्शकसामु केही बोल्न उत्सुक देखिएका थिए ।
‘हामी यो विपत्तिबाट बाहिर निस्कँदै फेरि जीवनको बाटोमा बढ्नु जरुरी छ । आशा गरौं, कालरात्री सकिएको छ र बिहानको उज्यालो फेरि हाम्रो निम्ति उदाउँदैछ । शोकलाई शक्तिमा बदल्दै अब पुनर्निमाणमा कस्सिनु समयको माग हो ।’ उनले यति भनेपछि अहिलेसम्म रिलिज नभएको नेपथ्यको नयाँ गीत सुनाए, ‘हो रामा रामा ।’
‘हामी नेपालीहरू घरपरिवारका निम्ति यति पर आइपुगेका छौं । आज आफन्तका निम्ति तपाईँको सबैभन्दा बढी जरुरी परेको छ । मिल्छ भने थोरै समयका निम्ति भए पनि छुट्टी लिएर उनीहरूलाई भेट्न जानुस् । तपाईँको उपस्थिति र तपाईँका पौरखी हातहरूको आज असाध्यै जरुरी परेको छ । आजको कार्यक्रम शोक र उमंगको गजब मिश्रण बन्न पुग्यो… अघिको गीतले जीवन हो घाम छायाँ भनेजस्तो,’ आयोजक टोलीका जस पाइजाले भने, ‘यस्तो जटिल परिस्थितिमा पनि दर्शकहरूको उपस्थिति देखेर निकै प्रभावित भएका छौं ।’
‘भेँडाको ऊनजस्तो’ गाउनुअघि अमृतले उक्त गीत संकलनका निम्ति लाङटाङ क्षेत्रमा बिताएका क्षणहरूको सम्झना पनि गरेका थिए । यतिबेला भूकम्पले गर्दा आएको पहिरोमा पुरिएर सिंगो लाङटाङ गाउँको अस्तित्व नै लोप भइसकेको छ ।
‘नेपाल क्षतिग्रस्त मात्र भएको छ, ध्वस्त भइसकेको छैन । तपाईंका विदेशी साथीहरूले सहयोगका निम्ति के गर्न सक्छौं भनेर सोधेको खण्डमा सहानुभूतिले भरिएका केही नगद वा जिन्सी होइन, त्यो सुन्दर मुलुक घुम्नका निम्ति जाउ भनेर सल्लाह दिनूस्,’ अमृतले थपे, ‘त्यसबाट पनि हाम्रो पुनर्निर्माणमा जुटेको अर्थतन्त्रलाई धेरै सघाउ पुग्नेछ ।’