५ कार्तिक २०७८, शुक्रबार १२:४२ बुधवार साप्ताहिक, नयाँबानेश्वर, काठमाण्डौं

जयनगर–कुर्था रेलमार्ग नेपाललाई हस्तान्तरण

५ कातिक, काठमाडौं । भारत सरकारको सहयोगमा निर्मित जयनगर–कुर्था सीमापार रेलमार्ग भारतले नेपाल सरकारलाई हस्तान्तरण गरेको छ ।

भौतिक पूर्वाधार तथा यातायातमन्त्री रेनुकुमारी यादव र नेपालका लागि भारतीय राजदूत विनय मोहन क्वात्राको उपस्थितीमा रेलमार्ग नेपाल सरकारलाई हस्तान्तरण गरिएको हो । समारोहमा भारत सरकारको तर्फबाट परियोजनाको कार्यान्वयन निकाय आईआरसीओएन इन्टरनेसनल लिमिटेडले सो रेल खण्ड नेपाल सरकारको तर्फबाट उपस्थित नेपाल रेलवे कम्पनी लिमिटेडलाई हस्तान्तरण गरेको नेपालस्थित भारतीय दूतावासले प्रेस विज्ञप्तिमा जनाएको छ ।

भारत सरकारको आर्थिक सहयोगमा भारतको जयनगरदेखि नेपालको कुर्थासम्मको ३४.९ किलोमिटर न्यारो गज खण्डलाई ब्रोड गजमा रुपान्तरण गर्ने कार्य सम्पन्न भएको थियो । भारतको आर्थिक सहयोग अन्तर्गत नेपाली ७७ अर्ब रुपैंयामा निर्माण भएको ३४.९ किलोमिटर जयनगर–कुर्था खण्ड ६८.७२ किलोमिटर जयनगर–बिजलपुरा–बर्दिबास रेलमार्गकै एक हिस्सा रहेको दूतावासले जनाएको छ ।

यो खण्ड पहिले जयनगर र बिजलपुराबीच न्यारो गज रेलमार्गको रुपमा रहेको थियो । जयनगर–कुर्था खण्डमा कूल ८ वटा स्टेशन र साना स्टेशन रहेका छन् जसमा जनकपुरको ऐतिहासिक महत्वको शहर पनि सामेल छ विज्ञप्तिमा भनिएको छ ।

एकपटक सञ्चालनमा आए लगत्तै यो भारत र नेपालबीचको पहिलो ब्रोड गज सीमापार रेलमार्ग हुने दूतावासले उल्लेख गरेको छ । ‘यसले दुई देशबीचको व्यापार र वाणिज्य गतिविधिहरुलाई थप बढावा दिनुका साथै जनताबीचको सम्बन्धलाई अझ सुदृढ गर्नेछ’ विज्ञप्तिमा छ ।

सीमापार रेल सञ्जाल दुई देशबीचको द्विपक्षिय सहकार्यको महत्वपूर्ण पाटो रही आएको छ । जसमा जयनगर–बिजलपुरा–बर्दिबास रेलमार्ग र १८.६ किलोमिटर जोगबनी–विराटनगर रेलमार्ग समेत छन् ।