८ जेष्ठ २०८३, शुक्रबार ०६:४५ बुधवार साप्ताहिक, नयाँबानेश्वर, काठमाण्डौं

आज बस्दै दस संसदीय समितिका बैठक : बजेट, मानवअधिकार र पूर्वाधारमा छलफल हुने

काठमाडौं । संघीय संसदअन्तर्गत रहेका दस विभिन्न संसदीय समितिका बैठक आज बस्ने भएका छन्। आजका बैठकहरूमा आगामी आर्थिक वर्ष २०८३/८४ को बजेट तयारी, मानवअधिकार अवस्था, पूर्वाधार निर्माण, विपद् तयारी तथा विभिन्न प्रशासनिक विषयमा व्यापक छलफल हुने जनाइएको छ।

विशेषगरी अर्थ समितिसहितका केही समितिले आगामी बजेटका लागि प्राप्त सुझाव, प्राथमिकता तथा तयारीबारे छलफल गर्ने कार्यक्रम रहेको छ। सरकारले ल्याउन लागेको नयाँ बजेटको प्रभावकारी कार्यान्वयन, विकास खर्च, राजस्व व्यवस्थापन तथा आर्थिक सुधारका विषय बैठकको मुख्य एजेन्डा बन्ने बताइएको छ।

कानुन, न्याय तथा मानवअधिकार समितिले गृह मन्त्रालयसँग कारागारभित्रको मानवअधिकार अवस्थाबारे छलफल गर्ने तयारी गरेको छ। बन्दीहरूको अवस्था, कारागार व्यवस्थापन तथा मानवअधिकार संरक्षणका विषयमा समितिले मन्त्रालयसँग जानकारी लिनेछ।

महिला तथा सामाजिक मामिला समितिले महिला, बालबालिका तथा ज्येष्ठ नागरिक मन्त्रालयसँग आगामी बजेट र सामाजिक सुरक्षासम्बन्धी कार्यक्रमबारे समीक्षा गर्नेछ। त्यसैगरी पूर्वाधार विकास समितिले मध्यपूर्व क्षेत्रमा जारी युद्धका कारण सार्वजनिक पूर्वाधार आयोजनामा परेको प्रभावबारे छलफल गर्ने कार्यक्रम तय गरेको छ।

यस बाहेक सञ्चार तथा सूचना प्रविधि मन्त्रालयका विद्यमान योजना, भूमिहीन सुकुम्बासी अनुगमन, विपद् पूर्वतयारी तथा बेरुजु फर्छ्योटजस्ता विषयमा समेत विभिन्न समितिहरूमा छलफल हुने संसद सचिवालयले जनाएको छ।

आजका बैठकलाई आगामी बजेट, विकास योजना तथा समसामयिक राष्ट्रिय चुनौतीहरूबारे महत्वपूर्ण तयारीका रूपमा हेरिएको छ।