२ पुष २०७६, बुधबार ०५:२१ बुधवार साप्ताहिक, नयाँबानेश्वर, काठमाण्डौं

कम्पनी रजिस्ट्रारलाई डिएसपीले टेरेनन्

काठमाडौं । यसअघि विभिन्न अभियोग र मुद्दाबाट पराजित मात्र होइन, नेपालको नागरिकतासमेत बदर भइसकेको व्यक्तिको पक्षमा महानगरीय प्रहरी परिसर कमलपोखरीका डिएसपी भरतबहादुर विक उभिएका छन् । लामो समयदेखि सेयरमा विवादास्पद रहेको र मुद्दा चलिरहेको कन्सल्टेन्सी कम्पनी एइसिसी ग्लोबलको ५० प्रतिशतभन्दा बढी सेयरकर्ताको हैसियतमा रहेका राजेन्द्र वैद्य कार्यालयमा प्रवेश गर्न त्यस कम्पनीका कर्मचारीहरूले अवरोध गरेपछि प्रहरी कार्यालयका डिएसपी विक समेत कर्मचारीहरूको पक्षमा उभिएका छन् ।
वैद्यले कम्पनी रजिस्ट्रारको कार्यालयबाट आफ्नो पक्षमा सेयर अधिकारसहितको पत्र कार्यालय गएर काम गर्न दिने वातावरण प्रदान गर्न प्रहरीलाई गरिएको अनुरोधपत्रको समेत अटेर गरेर कार्यालयमा रोक लगाउने उच्छृंखल कर्मचारीको पक्ष लिएका छन् । कम्पनी रजिस्ट्रार कार्यालयका सहायक रजिस्ट्रार राजनकुमार बस्नेतले यही मंसिर २९ गते दिएको पत्रको आधारमा वैद्यलाई कार्यालय प्रवेश गरेर कामकाज गर्न दिनुपर्नेमा त्यहाका कर्मचारी शैलेश झा र महेश सुब्बाले अवरोध गरिरहेको बताइन्छ । सो अवरोधका विरुद्ध प्रहरीको सहयोग माग्न पुगेका वैद्यलाई असहयोग गरेर विपक्षीबाट आर्थिक लाभ लिएको हुन सक्ने एक पक्षको बुझाइ छ ।
त्यसो त आफ्नो अनुरोध स्वीकार नगरेपछि काठमाडौंका प्रमुख जिल्ला अधिकारीको तोक आदेशसमेत लिएर वैद्य प्रहरीकोमा पुगेका थिए । सो आदेशसमेत अटेर गरेको बताइएको छ । चिनी माफिया शशीकान्त खेतानको अप्रत्यक्ष संलग्नता रहेकाले ती कर्मचारीहरूले उफ्रीपाफ्री गरी कार्यालयको काममा अवरोध गरेको बताइन्छ । दोहोरो नागरिकता लिएको प्रमाणित भएपछि कम्पनी सञ्चालकहरू अहिले फरार छन् भने उनीहरूलाई बैंकिङ ठगी मुद्दामा समेत वारेन्ट काटिएको छ । नेपालमा गलत विवरण पेस गरेर नागरिकता लिएका भारतीय व्यक्तिहरूले भारतमै पनि गलत विवरण पेस गरेर नागरिकता लिएको फेला परेको थियो । उक्त कम्पनीका ५० प्रतिशतको साझेदार तथा कम्पनीमा अध्यक्षको हैसियतमा रहेकी श्रीमती लोचनकुमारी हरलालका, निजका श्रीमान् जयप्रकाश अग्रवाल र दुई छोरा रञ्जित र छोरी रुबीको जन्मका आधारमा लिएको नेपाली नागरिकता नै नक्कली रहेको तथ्यसहित पर्साका प्रमुख जिल्ला अधिकारी नारायणप्रसाद शर्माले शंकास्पद नेपाली नागरिकता रद्द गर्न र उनीहरूको सम्पत्ति जफत गर्नुपर्ने व्यहोराको सिफारिसपत्र गृहलाई पठाएका थिए । कम्पनीका कर्मचारीहरूले उक्त कम्पनी एकलौटी हत्याउन खोजेकाले वैद्यलाई अवरोध गरे पनि कानुनी रूपमा उनी माथि रहेकाले कुनै हालतमा नछोड्ने उनले बताए । यस विषयमा डिएसपी विकको प्रतिक्रिया लिन खोज्दा उनले फोन उठाएनन् ।