20th February 2018, Tuesday

E-budhabar

युवा नेताको प्रदेश मन्त्रीमा बार्गेनिङ



युवा नेताको प्रदेश मन्त्रीमा बार्गेनिङ

काठमाडौं । नेकपा (एमाले) लाई क्रियाशील राजनीतिक दलका रूपमा हेर्ने गरिन्छ । केन्द्रदेखि तल्लो तहसम्मै एमालेको संगठन मजबुत, सुदृढ र शक्तिशाली हुनुमा नेता–कार्यकर्ताहरूको सक्रियता र हरेक जनवर्गीय संगठनका सदस्यहरूको लगावलाई लिइने गरिएको छ । साथै, स्थानीय, प्रदेश र प्रतिनिधिसभाको निर्वाचनपछि एमाले पहिलो शक्तिको रूपमा स्थापित हुनुलाई एमालेका कार्यकर्ताहरूकै क्रियाशीलता मान्न सकिन्छ ।
तर, लाखौं युवालाई गोलबन्द गर्ने एमालेको भ्रातृ संगठन युवासंघ भने अहिले अस्तित्वमा छ कि छैन, खोज्नुपर्ने बेला भएको छ । युवा संघको अधिवेशन हुन नसकेको त वर्षौं भयो, केन्द्रीय समितिको बैठक बस्नै नसकेको एक वर्ष पुग्यो । एक वर्षअघि २०७३ माघ २३–२५ सम्म बसेको बैठकपछि अहिलेसम्म एकपटक पनि केन्द्रीय समितिको बैठक बस्न सकेको छैन ।
२०७२ कात्तिक १५–१६ गते बसेको केन्द्रीय समितिको बैठकमा तत्कालीन कार्यवाहक अध्यक्ष निरु पालले राजीनामा दिएपछि राजीव पहारीको नेतृत्वमा नवौं आयोजक कमिटी गठन भएपछि संघको अत्तोपत्तो नै हुन छाडेको हो । सो बैठकले ६ महिनाभित्र सम्मेलन गर्ने भनेर पहारीलाई संयोजकको जिम्मेवारी दिएको थियो । तर, ६ महिनामा सम्मेलन गर्ने कुरा त टाढाकै विषय रह्यो, बैठक मात्रै पहारी अध्यक्ष भएको १६ महिनापछि हुन सकेको थियो ।
२०७४ वैशाख ९–१२ सम्म हेटौंडामा अधिवेशन गर्ने निर्णय भए पनि चुनावलाई बहाना बनाएर अधिवेशन सार्ने काम गरिएको थियो । पहारीलाई संयोजक बनाए पनि उनले संघ हाँक्न नसकेपछि चुनावअघि उनलाई हटाउन हस्ताक्षर अभियानसमेत चलेको थियो । उक्त हस्ताक्षर एमाले अध्यक्ष केपी शर्मा ओलीलाई समेत बुझाइएको थियो । तर, चुनावको मुखमा विवाद चर्काउँदा त्यसले असर पुग्छ भनी हस्ताक्षर प्रकरणलाई गुपचुप राखिएको थियो ।
संयोजक पहारी अहिले प्रदेशसभा सांसदमा निर्वाचित भएका छन् । उनी मंसिर २१ गते सम्पन्न प्रदेशसभा निर्वाचनमा कास्कीको क्षेत्र नं. ३ (ख) बाट निर्वाचित भएका हुन् । सांसदमा निर्वाचित भएपछि उनलाई युवा संघको नेतृत्व छाड्न दबाब आइरहेको छ । केन्द्रीय समितिका बहुसंख्यक सदस्यले उनलाई पद छाड्न दबाब दिइरहेका छन् । तर, अचेल सांसद पहारीले भने एमालेको नेतृत्व तहसँग बार्गेनिङ गरिरहेको कुरा खुल्न आएको छ । यसअघि, एमालेको नेतृत्वसामु उनले ‘आफूलाई सांसदको टिकट दिए युवा संघको अध्यक्ष छाड्छु’ भनेर वाचा गरेको बताइन्छ । उनले भनेबमोजिम नै एमालेले उनलाई टिकट दिएको थियो र उनी निर्वाचित पनि भए । अहिले भने उनले फेरि नयाँ बार्गेनिङ नेतृत्वसामु गरिरहेको बुझिएको छ । सूत्रका अनुसार उनले आफूलाई ४ नम्बर प्रदेशको मन्त्री बनाए युवा संघको अध्यक्ष तत्काल छाड्ने बताइरहेका छन् ।
एमाले नेतृत्वसामु मन्त्रीका लागि बार्गेनिङ गरे पनि युवा संघका अधिकांश सदस्यहरू भने उनीप्रति रुष्ट छन् । पहारी रहेसम्म युवा संघको सम्मेलन नहुने निष्कर्ष निकाल्दै उनलाई हटाउनुपर्ने आवाज प्रखर बन्न पुगेको छ । एक जना केन्द्रीय नेताले भने, ‘हामीले उहाँलाई तुरुन्त बैठक बोलाउनुस् भनेका छौं । तर, उहाँले समय दिन सक्नुभएको छैन । उहाँ संयोजक रहेसम्म युवासंघको सम्मेलन हुन कठिन छ ।’

Leave a Reply

... र यो पनि ...

चक्रपथ

चन्द्रागिरिको ढुंगामा क–कसले गर्दै छन् गोलमाल ?

काठमाडौं । थानकोट–चन्द्रागिरि–चित्लाङ सडक आयोजना निर्माणका क्रममा ठेकेदारले उत्खननपछि आएको ढुंगा बेच्न पाउनुपर्ने लबिइङमा स्थानीय जनप्रतिनिधिहरू नै लागेका छन् । नीतिगत- ...
पूरा पढ्नुहोस्

स्रष्टा र सिर्जना

पुरस्कार र मेला–केन्द्रित प्रकाशन व्यवसाय

यस वर्षको हिउँदमा नेपाली प्रकाशनगृहहरू फेरि सुस्ताउन पुगे । हरेक वर्षको हिउँदमा निजी प्रकाशन गृहहरूले पुस्तक प्रकाशनमा तदारुकता देखाउन चाहँदैनन् । यो एउटा नियमित प्रक्रियाजस्तै- ...
पूरा पढ्नुहोस्

नयाँ पुस्तक

व्यक्तिवृत्त उघिन्ने कार्य

कुन मानिसमा कति प्रतिभा रहेको छ, कस्तो आनिबानी छ र के–कस्ता विषयहरूमा रुचि छन् ? यी सबै कुरा थाहा पाउन त्यस्ता मानिससँग गहिरो मित्रता र संगतको आवश्यकता पर्दछ । बाह्य रूपमा नियालेर- ...
पूरा पढ्नुहोस्

छोटकरीमा