६ भाद्र २०७१, शुक्रबार ०८:१२ बुधवार साप्ताहिक, नयाँबानेश्वर, काठमाण्डौं

राजधानीमा गुन्डाका ६ गिरोह

काठमाडौं । गुन्डा नाइके दिनेश अधिकारी (चरी) मारिएपछि दबाबमा रहेको प्रहरी काठमाडौं उपत्यकाका अरू गुन्डाहरूलाई पक्राउ गर्ने अभियानमा छ । प्रहरीका अनुसार, काठमाडौं, ललितपुर र भक्तपुरमा गरी गुन्डाहरूका ६ र्‍याकेट (समूह) छन्, जसलाई राजनीतिक संरक्षण छ ।
रामेछापका रमेश बाहुन (सुजन पौडेल) र अभिशेक गिरीलाई पक्राउ गरेपछि प्रहरीले तिनीहरूको र्‍याकेट तहसनहस भएको दाबी गरेको छ । तर, चरी मारिए पनि उनको समूहले भने थप ‘रिटालियट’ गर्न सक्ने खतरा प्रहरीले देखेको छ । एक अधिकारी भन्छन्– ‘त्यसका केही सूचनाहरू आएका छन् ।’ पुराना गुन्डा समूहको चहलपहल भने कम देखिँदै गएको छ । जस्तो– कुनै बेला आतंकका पर्याय दीपक मनाङे अहिले प्रहरीका लागि खासै चुनौती बनेका छैनन् । उमेर ढल्किँदै जाँदा र घरमा परिवारको दबाब बढ्दै जाँदा पनि यस्तो हुने प्रहरीको अनुभव छ । मनाङेको समूहले अहिले ठमेलतिर फाट्टफुट्ट तर्साएको सूचना आए पनि आफ्नै व्यापारमा लागेको प्रहरीको भनाइ छ । तर, नयाँ–नयाँ समूहले भने प्रहरीको टाउको दुखाइरहेका छन् ।
पहिलो– गणेश लामा समूह
विजय गच्छदारले नेतृत्व गरेको फोरम (लोकतान्त्रिक) का केन्द्रीय सदस्य बनाइएका काभ्रेका गणेश लामाको समूह आर्थिक लेनदेनका आधारमा अहिले सबभन्दा ठूलो र बलियो समूहका रूपमा प्रहरीले चित्रित गरेको छ । उक्त समूहमा काभ्रेकै बले, दावा लामा र विष्णु लामाले नेटवर्क चलाइरहेका छन् । कांग्रेसका केन्द्रीय सदस्य शंकर भण्डारी र पहिला यस्तै असुलीमा लाग्दालाग्दै पछि ठेकेदार हुँदा अहिले कांग्रेसका तर्फबाट काभ्रेबाट निर्वाचित सभासद् तीर्थ लामाको कारोबारमा पनि यिनीहरूको संलग्नता रहेको सूचना प्रहरीसँग छ । ‘यस ग्याङलाई धेरै थरीको राजनीतिक संरक्षण छ’– अनुसन्धानमा संलग्न एक मध्यमस्तरका प्रहरी अधिकारीले भने– ‘त्यही भएर अलि जटिल पनि छ ।’ लामाका विरुद्ध सम्पत्ति शुद्धीकरण विभागले विशेष अदालतमा अकुत सम्पत्ति आर्जनको मुद्दासमेत दायर गरिसकेको छ ।
दोस्रो– घैंटे–राधे समूह
चरीका विरुद्ध आक्रामक रूपमा उत्रिएको यस समूहलाई प्रहरीले पिछा गरिरहेको छ । नयाँ बजारतिरका कुमार घैंटे र धादिङका राधे भण्डारीको यस समूहले बालुवा, गिटी, इटादेखि यातायात क्षेत्रमा समेत हात हालेर रकम असुली गरिरहेको छ । धादिङका कांग्रेस नेता रामनाथ अधिकारीको विशेष सम्पर्कमा रहेका यस समूहले चरी काण्ड चर्किएका कारण तत्काल चुप बस्न खोजेकाले हिजोआज कतै ज्यादती गरेको सूचना भने प्रहरीसम्म आइपुगेका छैन । ‘त्यही कारण हो’– अपराध अनुसन्धान महाशाखा स्रोत भन्छ– ‘अबको टार्गेट आफू हुन्छौं भन्ने यिनीहरूलाई थाहा छ ।’
तेस्रो– मीनकृष्ण समूह
ललितपुरमा सक्रिय यो समूहले बालुवाखानी, ढुंगाखानी, सडक यातायातका साथै सहकारीहरूलाई निसाना बनाइरहेको सूचना प्रहरीले पाएको छ । कांग्रेसका महासमिति सदस्य रहेका मीनकृष्णलाई मुख्य रूपमा वीरेन्द्र महर्जनले सघाइरहेका छन् । मीनकृष्णलाई कांग्रेसले यसअघि राष्ट्रिय खेलकुद परिषद्को कोषाध्यक्ष पनि बनाएको थियो । उनलाई कांग्रेस महामन्त्री तथा उपप्रधानमन्त्री प्रकाशमान सिंहको विशेष आशीर्वाद छ । साथै, ललितपुरका कांग्रेस नेता चन्द्र महर्जन र मदन अमात्यको पनि उनीहरूसँग सम्बन्ध देखिएको प्रहरी
स्रोतले बतायो ।
चौथो– चरी समूह
यस समूहका नाइके चरी मारिए पनि उनको समूहले भक्त खत्रीको नेतृत्वमा आफूलाई संगठित गरिरहेको प्रहरीले बतायो । यस समूहमा पञ्चे लामा र डार्बिन नाम गरेका अर्का एक जना मुख्य रूपमा सक्रिय छन् । यसले पनि ठमेल–नयाँ बजारलाई आफ्नो ‘कार्यक्षेत्र’ बनाएको छ । चरीको बिछोडमा भावविह्वल बनेर सदनदेखि पार्टी कार्यालयसम्म नाराबाजी गर्ने एमालेका नेताहरूले यसलाई संरक्षण दिइरहेको प्रहरीको भनाइ छ ।
पाँचौं– चक्रे मिलन समूह
लामो समयदेखि डनगिरीमा टिकिरहेका चक्रे मिलन (मिलन गुरुङ) ले आफ्नै दाजुभाइलाई समेटेर गुन्डागर्दीको यो समूह चलाइरहेका छन् । बेला–बेलामा जेल जाने र बाहिरिने गरेका चक्रेले अहिले खासै गतिविधि गरेको सूचना प्रहरीलाई आएको छैन । चक्रेले एमाले नेता प्रदीप नेपालकी पत्नी झुमालाई दिदी बनाएका छन् र तिहारमा टीका लगाउँछन् । अहिले नेपाल स्वयम् गृहमन्त्रीको सल्लाहकार भएको बेला उनी शान्त देखिएको एक प्रहरी
अधिकारीले बताए ।
छैटौं– दीपक–सगुन समूह
भक्तपुरमा क्रियाशील यस समूहका नाइके दीपक थापा र सगुन श्रेष्ठ हुन्, जो एमालेका केही नेताका वरिपरि देखिन्छन् । प्रहरीका अनुसार, दीपकले केही दिनअघि तिनै नेताको पहलमा प्रहरीका एक उच्च अधिकारीलाई भेटेर आफू अब गुन्डागर्दीमा नलाग्ने, पार्टीमा प्रवेश गरिसकेकाले राजनीति गर्ने र आफूलाई त्यही अनुसारको व्यवहार गर्नुपर्ने माग गरेका थिए । उनलाई नजिकबाट नियालिरहेका ती अधिकारीले भने– ‘हामीले उनका गतिविधि वाच गरिरहेका छौं, भक्तपुरमा छिसिक्क केही भयो भने उनै हुन् भन्ने बुझे हुन्छ ।’
गुन्डाको हुन्छ, आफ्नै कार्यक्षेत्र
गुन्डागर्दीका गुन्डाहरूले कार्यक्षेत्र छुट्याएका हुन्छन् । ‘प्राय: एउटाको क्षेत्रमा अर्को प्रवेश गर्दा ग्याङ फाइट हुन्छ’– अपराध अनुसन्धान महाशाखाका प्रमुख एसएसपी पुष्कर कार्की भन्छन्– ‘अनि एउटाले अर्कालाई हप्तावारी र महिनावारी पनि बुझाउँछन् भन्ने सूचना हामीले पाएका छौं ।’ जस्तो– गत महिना पक्राउ नपरुञ्जेल रमेश बाहुन (सुजन पौडेल) ले गणेश लामा र चरी दुवैको समूहबाट नियमित रूपमा हप्ता र महिनावारी पाउँथे । ‘त्यहाँ पनि को सिनियर र को केटा हो भन्ने हुन्छ’– ती अधिकारी भन्छन्– ‘त्यस आधारमा कार्यक्षेत्र बाँडफाँट हुन्छ ।’
रमेश बाहुन रोए
प्रहरीलाई चुनौतीका रूपमा खडा भएका र डनहरूबाट पनि नियमित असुल गर्ने रमेश बाहुन आफ्ना सामु रोलान् भन्ने कल्पना प्रहरी अधिकारीले पनि गरेका थिएनन् । तर, अघिल्लो महिना पक्राउ परेर जेल चलान हुँदा भने उनी डाँको छोडेर रोए । लागू औषधमा समातिएका कारण आफू अब कम्तीमा १५ वर्ष जेल बस्नुपर्छ भन्ने कुराले उनलाई यति झस्काएछ ‘म त यस्तै भएँ, मेरी श्रीमती र छोरीले दु:ख पाउने भए’ भन्दै उनी रोएका थिए ।