२४ मंसिर २०७७, बुधबार ०६:०४ बुधवार साप्ताहिक, नयाँबानेश्वर, काठमाण्डौं

सगरमाथाको उचाइ कति ?

काठमाडौं । विश्वको सर्वोच्च शिखर सगरमाथाको उचाइ कति छ ? भनेर प्रश्न गर्दा फ्याट्ट ८,८४८ मिटर भन्न अभ्यस्त भइसकेकाले अब यसको उत्तर दिन केहीछिन घोत्लिनुपर्ने भएको छ । मंगलबार नेपाल र चीनले एकैपटक सगरमाथको नयाँ उचाइ सार्वजनिक गरेका छन् । नयाँ मापनमा यसको उचाइ ८६ सेन्टिमिटर बढेर ८,८४८.८६ मिटर भएको छ । नेपाल र चीनले एकैपटक सो उचाइ सार्वजनिक गरेको हो ।
नापी विभागमा आयोजित पत्रकार सम्मेलनमा परराष्ट्रमन्त्री प्रदीपकुमार ज्ञवालीले सगरमाथाको नयाँ उचाइ घोषणा गरेका हुन् । उचाइ मापन भने नेपाल र चीनले छुट्टाछुट्टै गरेको थियो । यसअघिको उचाइ ८,८४८ मिटर सन् १९५४ सर्वे अफ इन्डियाले नापेको हो । सगरमाथाको उचाइबारे विवाद देखिएपछि सन् २०१० मा नेपाल र चीनबीच ८,८४८ मिटरलाई नै मान्यता दिने साझा धारणा बनेको थियो । करिब दुई वर्षअघि विभागले सगरमाथाको मापन गर्न सुरु गरेको हो । यसका लागि सुशील डंगोलको संयोजकत्वमा सगरमाथा मापन सचिवालय टोली गठन गरिएको थियो । १० मंसिरमा बसेको मन्त्रिपरिषद् बैठकले भूमि व्यवस्था, सहकारी तथा गरिबी निवारण मन्त्रालयलाई उचाइ सार्वजनिक गर्न स्वीकृति दिएको थियो । चीनसँग समन्वय भने परराष्ट्र मन्त्रालयले गरेको हो ।