१४ माघ २०७१, बुधबार १०:४० बुधवार साप्ताहिक, नयाँबानेश्वर, काठमाण्डौं

ताण्डव नृत्य अशोभनीय

२०७१ साल माघ ५ गते बसेको संविधानसभाको बैठकमा नेकपा एमाओवादी गठबन्धनका सभासद्हरूले संविधानसभामा सुनियोजित तरिकाले संविधानसभाका सम्माननीय अध्यक्ष सुवासचन्द्र नेम्वाङ र नेकपा (एमाले)का श्रद्धेय अध्यक्ष तथा संसदीय दलका नेता केपी ओलीलगायतका सभासद्हरूमाथिको आक्रमण र संविधानसभामा गरेको तोडफोडले माओवादी गठबन्धनका पार्टीहरूको असली अनुहार उदांग भएको छ । सार्वभौम संविधानसभामार्फत् संघीय लोकतान्त्रिक गणतन्त्र नेपालको लोकतान्त्रिक संविधान निर्माण गरेर ०६२/६३ सालको जनक्रान्तिका उपलब्धिहरूलाई संस्थागत गर्नुको सट्टा सार्वभौम संविधानसभाभित्र देखाएको अराजक गतिविधि एवम् अमानवीय ताण्डव नृत्य सभ्य नागरिकका लागि अत्यन्त अशोभनीय लज्जाजनक भएकाले नेपाल बुद्धिजीवी परिषद् यस्ता घृणित कार्यप्रति खेद प्रकट गर्दछ ।
संविधानका विवादित विषयमा सहमति जुट्न नसकेको अवस्थामा अन्तर्राष्ट्रिय प्रचलन र लोकतान्त्रिक मूल्य–मान्यताका आधारमा संविधान निर्माण गरी घोषणा गर्नुको विकल्प नरहेको अवस्थामा संविधानसभाभित्र तोडफोड, आक्रमणका साथै नेपाल बन्दका क्रममा देखिएका हिंस्रक एवम् अमानवीय गतिविधिको नेपाल बुद्धिजीवी परिषद् घोर निन्दा र भत्र्सना गर्दछ ।