काठमाडौं — कानून कार्यान्वयनको एक उल्लेखनीय उदाहरण प्रस्तुत गर्दै आज ट्राफिक प्रहरीले प्रतिनिधिसभाका सभामुख देवप्रसाद अर्याल (डीपी अर्याल) सवार गाडीलाई ट्राफिक नियम उल्लंघन गरेको भन्दै जरिवाना गरेको छ।

प्राप्त जानकारीअनुसार, उक्त घटना थापाथली क्षेत्रमा भएको हो। ट्राफिक प्रहरीले दिएको विवरण अनुसार सभामुखको सवारीले लेन मिचेर नियम उल्लंघन गरेको पुष्टि भएपछि कारवाही अघि बढाइएको हो। त्यसपछि सभामुखको सवारी, अगुवा र सुरक्षा गाडीसहितको काफिला सिंहदरबारतर्फ अघि बढेको थियो। सो समयमा सभामुख अर्याल स्वयं गाडीभित्र थिए वा थिएनन् भन्ने विषय भने अझै पुष्टि हुन सकेको छैन।

ट्राफिक प्रहरी टोलीले काफिलालाई पछ्याउँदै प्रधानमन्त्री तथा मन्त्रिपरिषद्को कार्यालयसम्म पुगेर जरिवाना काटेको जनाएको छ। ट्राफिक स्रोतका अनुसार “पद र हैसियत जस्तोसुकै भए पनि कानून अगाडि सबै बराबर हुन्छन्” भन्ने सन्देश दिन यो कारवाही गरिएको हो।

यस क्रममा सभामुखको काफिलामा रहेका जम्मा तीन वटा सवारीसाधनलाई जरिवाना गरिएको ट्राफिक प्रहरीले पुष्टि गरेको छ।