१४ जेष्ठ २०७१, बुधबार ०७:१५ बुधवार साप्ताहिक, नयाँबानेश्वर, काठमाण्डौं

राजेश हमालप्रति एउटा यस्तो अपेक्षा

नेपाली चलचित्र जगत्को तीव्रतर विकास एवम् अति उर्वर कालमा उदाएका अभिनेता राजेश हमाल पुन: एक पटक चर्चा/परिचर्चाको शिखरवृत्तमा आबद्ध हुन पुगेका छन् । तथापि, पछिल्लो पटक उनी चर्चाको केन्द्रमा रहनुमा उनको कुनै चलचित्र ‘हिट’ भएर होइन, उमेरले क्रमश: नेटो काटिरहेका बेला वैवाहिक सम्बन्ध स्थापित गरेका कारण अहिले उनी मिडियाको नजरमा परेका हुन् । पाँच दशकभन्दा बढी नै उमेर छिचोलिसकेका नेपाली चलचित्रका यी लोकप्रिय नायकको विवाहले चर्चा बटुल्नु एउटा स्वाभाविक पक्ष बन्थ्यो र बन्यो पनि अन्तत: ।
मूलत: कलाकर्मीहरूको जीवन सार्वजनिक हुन्छ । र, सार्वजनिक व्यक्तिप्रति आम मानिसमा चासो उत्पन्न हुनुलाई नाजायज कुरा मान्न सकिँदैन । सार्वजनिक जीवन बाँचेका व्यक्तिहरूका बाह्य मात्र होइन, आन्तरिक पक्षबारे बुझ्ने, खोतल्ने र कोट्याउने कार्यमा पनि व्यक्ति र समाजको उत्तिकै लगनशीलता देखिन्छन् । त्यस्ता व्यक्तिहरूका पारिवारिकदेखि अन्य झिना मसिना पक्षहरूबारे चासो उत्पन्न हुनुलाई अनौठो मानिँदैन । निश्चय नै, सार्वजनिक जीवन जिउनेहरूलाई आफ्नो निजी कुरा जोगाउन गाह्रो हुन्छ । विश्वका कुनै पनि सार्वजनिक जीवन व्यतीत गरेका व्यक्तिहरूले आफ्ना निजी जिन्दगीका पाटाहरू लुकाउन अनेक प्रयत्न गरे पनि त्यो कुनै न कुनै छिद्रबाट बाहिरिने गरेको छ । न बेलायती युवराज्ञी डायनाले आफ्ना निजी कुरा लुकाउन सकिन्, न त हिन्दी चलचित्रका नायक रणवीर कपुर र नायिका क्याट्रिना कैफको समुन्द्री किनारमा चलेको रोमान्स नै लुक्न सक्यो । तथापि, पचासको दशकमा नेपाली चलचित्र क्षेत्रमा एकछत्र राज गरेका हमालको जीवनका निजी पाटो बुझ्न जोकोही लालायित हुनु स्वाभाविक पक्ष थियो ।
नायक हमालको बिहेसँगै उनको बिहे हुन्छ वा हुँदैन र भए कोसित हुन्छ र कोसित अफेयर्स चलिरहेको छ भन्ने जिज्ञासाको अन्त्य त भएको छ । तर, विवाह हुनुअघि भने हमालको बिहे–प्रसंगले पटक–पटक मिडियामा स्थान पाइरहन्थ्यो । उनीबारे कतिपय मिडियाले यथार्थ कुरा नै पस्किन्थे भने कतिपय मिडियाले ‘गसिप’ बनाएर पनि पस्किने गरेको थियो । नेपाली चलचित्रका केही स्थापित नायिकाहरूसित हमालको प्रेम प्रसंग बाहिर आउनु ठूलो कुरा त थिएन । तर, उनको ढल्किँदो उमेरसँगै अनुमान पनि लगाउने क्रम नचलेको होइन । हमालले विवाह बिना नै जिन्दगी गुजार्ने सोच त बनाइरहेका छैनन् ? यस्ता प्रश्न पनि बेलाबखत नउब्जिएका होइनन् ।
०४६ सालको राजनीतिक परिवर्तनपछि हरेक क्षेत्र र तप्कामा सम्भावनाका नयाँ–नयाँ द्वारहरू खुले । र, कुनै बेला पञ्चायती व्यवस्थाको प्रचार–यन्त्रका रूपमा राज्यको ढुकुटीबाट लगानी गरेर चलचित्र निर्माण गरिने परिपाटीको अन्त्यसँगै चलचित्र निर्माणले क्रमश: गति लिइरहेको थियो । र, परिवर्तित समय र माहौलसँगै चालीसको दशकको अन्त्यदेखि नेपाली चलचित्र क्षेत्रले गतिशीलता पक्डियो । चलचित्र क्षेत्रले गति पक्डिएको त्यही समयावधिमा हमाल चलचित्र क्षेत्रमा नौलो अनुहारका रूपमा देखा परे र आफ्नो सीप, कला र कौशलका कारण हमालले पचासको दशकमा आफूलाई नेपाली चलचित्रका लोकप्रिय, अग्ला र अब्बल नायकका रूपमा स्थापित तुल्याए । नयाँ–नयाँ नायकहरूले वर्तमान नेपाली चलचित्र क्षेत्रमा दह्रो पैताला जमाए पनि अझै हमालको क्रेज बाँकी नै रहेको छ । र, चलचित्र क्षेत्रमा पुन: जम्ने हैसियत उनी राख्दछन् भन्नु मनासिव ठहर्ला ।
नेपाली चलचित्रको विकासको प्रारम्भिक चरणमा काठमाडौँका सम्भ्रान्त वर्गकै वर्चस्व रह्यो । अनौठो कुरा होइन, हमालले पनि सहरका सम्भ्रान्त वर्गकै प्रतिनिधित्व गर्दछन्, नेपाली चलचित्रमा । तथापि, चलचित्र क्षेत्रमा उनको प्रवेशलाई आश्चर्यको रूपमा पनि हेरिएको थियो, तत्कालीन समयमा । सम्भवत: तीव्र रुचिकै कारण चलचित्र क्षेत्रमा पदार्पण गरेर यही क्षेत्रबाटै आफ्नो पहिचान बनाउने इच्छास्वरूप उनले अभिनय–यात्रा थालनी गरेको हुनुपर्छ । नभए, काठमाडौँका सम्भ्रान्त परिवारका एक सदस्य, देश बाहिरै अध्ययन गरेका र साहित्यलगायत बिधाप्रति गहिरो अध्ययनमा समेत उत्तिकै चासो राख्ने कूटनीतिक परिवारभित्रका एक व्यक्तिले चलचित्रजस्तो पृथक्, अबौद्धिकहरूको जमघटथलो भनेर आलोचित हुने क्षेत्रमा पाइला राख्ने थिएनन् ।
नेपाली चलचित्रमा अभिनय गरेर आफ्नो लोकप्रियतालाई ह्वात्तै माथि उठाए पनि एउटा खट्किएको पक्ष भने हमालसितै जोडिएर आउँछन् । मूलत: उनलाई मूलधारका चलचित्रहरूले नै स्थापित तुल्याएको हो । मूलधारका चलचित्रभन्दा बाहेक, व्यावसायिक रूपले बनाइएका फर्मुलाबद्ध चलचित्रभन्दा अगल किसिमका चलचित्रमा भने उनको अभिनय–क्षमता नेपाली दर्शकहरूले अहिलेसम्म हेर्न पाएका छैनन् । राणा परिवारभित्रको प्रेम–प्रसंगलाई उजिल्याइएको ‘प्रेमपिण्ड’जस्ता चलचित्रमा भलै उनले उत्कृष्ट अभिनय गरे, पछिल्ला समयमा हदैसम्मको व्यावसायिक चलचित्रमा पनि लामो कपाल हल्लाउँदै उनले आफ्नो उपस्थिति जनाइरहे । तर, हमालले नेपाली समाजको विशिष्ट प्रतिनिधित्व गर्ने कुनै मौलिक, पृथक् चलचित्रमा भने आफ्नो अभिनय–कला देखाउन पाएका छैनन् । वा, त्यतातिर उनको रुचि नै नगएको हो ? अहिलेसम्म नेपाली दर्शकले केही भेउ पाउन सकेका छैनन् ।
तथापि, नयाँ–नयाँ नायक/नायिकाले नेपाली फिल्मी बजार ढाकिरहेको यो समय हमालजस्ता प्रतिभावान् कलाकर्मीले भने अझै चलचित्र क्षेत्रलाई योगदान दिन बाँकी नै छ । आखिर, बलिउडमा अभिताभ बच्चनको ‘जादू’ अहिलेसम्म चलि नै रहेको छ भने हाम्रा राजेश हमालले सुस्ताउनुपर्ने कुनै आधार देखिँदैन । बिहेपछि भित्रिने नयाँ उत्साहसँगै चलचित्र क्षेत्रमा पनि उनको सक्रियताको अपेक्षा गर्नु स्वाभाविकै होला ।