१६ असार २०७२, बुधबार ०८:२८ बुधवार साप्ताहिक, नयाँबानेश्वर, काठमाण्डौं

खासामा रोकिएका सामान ल्याउन पहल

काठमाडौं । चीनको खासा क्षेत्रमा बाटो अवरुद्ध हुँदा रोकिएको अर्बौं रुपियाँ बराबरको सामान नेपाल ल्याउन कूटनीतिक पहल सुरु भएको छ ।परराष्ट्रमन्त्री महेन्द्रबहादुर पाण्डेले यसको पहल गर्नुभएको हो । नेकपा (एमाले)का पोलिटब्युरो सदस्य अरुण नेपालको नेतृत्वमा नेपाल हिमालय सीमापार वाणिजय संघका पदाधिकारीसहितको टोलीले सोमबार मन्त्री पाण्डेलाई भेटेर यसको पहल गरिदिन अनुरोध गरेको थियो ।
नेपाली व्यापारीहरूको १० अर्ब रुपियाँ बराबरको सामान बाटोमा अलपत्र परेपछि व्यापारीहरूले नोक्सानी बेहोर्दै आएका छन् । चीनको खासा क्षेत्रमा रोकिएका सामानको राजस्व मात्र ४५ करोड रुपियाँ संकलन हुने कारण पनि सरकारी तवरबाट यसको पहल गरिनुपर्ने नेपालले बताउनुभयो । नेपाल हिमालय सीमापार वाणिज्य संघका वरिष्ठ उपाध्यक्ष बच्चु पौडेलले रोकिएका सामान बैलैमा नेपाल ल्याउन नसके धेरै व्यापारीहरूको उठिबास लाग्ने मन्त्रीसमक्ष जानकारी गराएका थिए ।
वैशाख १२ मा गएको भूकम्पपछिको सुक्खा पहिरोले बाटो अवरुद्ध हँुदा सामान अलपत्र परेका हुन् । वर्षा सुरु भएलगत्तै आएको पहिरोले अझै समस्या आएको छ । नेपाली उपकरणले अवरुद्ध बाटो पन्छाउन नसक्ने भएका कारण पनि चिनियाँ पक्षलाई अनुरोध गरिएको छ ।
मन्त्री पाण्डेले नेपालस्थित चिनियाँँ राजदूत, चीनस्थित नेपाली राजदूत र ल्हासामा रहेका महावाणिज्य दूतलाई टेलिफोन गरेर अवरुद्ध बाटो खुलाउन पहल गर्ने अनुरोध गरेका छन् । चिनियाँ सेनाले केन्द्रीय सरकारको आदेशबिना नेपाली भूमिमा काम नगर्ने कारण पनि बाटो खुलाउन केही समय ढिला भएको मन्त्री पाण्डेले जानकारी दिएका छन् ।
टोलीमा एमाले नेता नेपाल, हिमालय सीमापार वाणिज्य संघका वरिष्ठ उपाध्यक्ष पौडेल, महासचिव अर्जुन गौतम, वरिष्ठ सचिव अर्जुन कार्की, कोषाध्यक्ष कृष्ण क्षत्री, सिन्धुपाल्चोक उद्योग वाणिज्य संघका वरिष्ठ उपाध्यक्ष निमफुञ्जो शेर्पा सदस्य प्रेम लामा रहेका थिए । सो अवसरमा मन्त्री पाण्डेले आफूले सकेको सहयोग गरेर नेपाली व्यापारीको समस्या समाधान गर्ने वचन दिएका छन् ।