८ पुष २०७७, बुधबार ०४:०१ बुधवार साप्ताहिक, नयाँबानेश्वर, काठमाण्डौं

सानीमा हाइड्रोको चरम लापरबाही

काठमाडौं । रामेछापको लिखु गाउँपालिकास्थित लिखु तेस्रो आयोजनामा कार्यरत एक मजदुरको अवस्था गम्भीर हुँदा पनि उपचारमा लापरबाही भएको छ । सानीमा हाइड्रोद्वारा निर्माणाधीन आयोजनामा काम गर्ने क्रममा २२ वर्षीय मजदुर सुरज तामाङ गम्भीर घाइते भएका हुन् ।
हाल ललितपुरको बीएन्डबी अस्पतालामा तामाङको उपचार भइरहे पनि अवस्था चिन्ताजनक रहेको बताइएको छ । तामाङको ग्रिल झार्ने क्रममा बुधबार बिहान गिटी, बालुवा र सिमेन्ट घोल्ने मेसिनमा ज्याकेटको बाहुला तानिएपछि हात छिनेको हो । त्यसपछि बिरामी बेहोस अवस्थामा रहेपछि आयोजनाका हाकिमहरूले भने तत्काल हेलिकोप्टर ल्याएर बिरामीको उपचारका लागि काठमाडौंमा झिकाउनुपर्नेमा त्यसो नगरी राति अबेर मात्र काठमाडौंमा ल्याएका हुन् ।
सेती खोला आसपास रहेको सो परियोजना स्थलबाट बिरामीलाई मन्थली ल्याउन नै करिब तीन घन्टा लागेको थियो । त्यहाँसम्म ल्याएर पनि आयोजनासँगै रहेका थुप्रै गाडीमध्ये कुनैमा नल्याई भाडाको सवारी खोजेर ढिलो गरी ल्याइएको हो । तारन्तर रक्तश्राव भइरहेको र हात पनि बीभत्स ढंगले छिनेको बिरामीलाई त्यति लामो समय गाउँमै राखेपछि आयोजनाले बिरामीको ज्यानसँग गम्भीर ढंगले खेलबाड गरेको स्थानीयहरू बताउँछन् ।