४ मंसिर २०७९, आईतवार ०२:५६ बुधवार साप्ताहिक, नयाँबानेश्वर, काठमाण्डौं

माओवादी अध्यक्ष प्रचण्डले शिवनगरबाट गरे मतदान

४ मंसिर,चितवन । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड ’ले चितवनको शिवनगरबाट मतदान गरेका छन् । अध्यक्ष प्रचण्डले चितवनको नेपाल पुलिस स्कुल , शान्तिपुर ‘क’ केन्द्रबाट मतदान गरेका हुन् ।

मतदानपछि पत्रकारहरुको प्रश्नको जवाफ दिंदै उनले गठबन्धन प्रधानमन्त्रीकै विवादले नटुट्ने बताएका छन् । उनले भने, ‘प्रधानमन्त्रीको उम्मेद्वार धेरै छन् । निर्वाचन सकिएपछि प्रधानमन्त्री समस्याको विषय हुँदैन । गठबन्धनमा राम्ररी सल्लाह भएर सहजता साथ प्रधानमन्त्री छनौट गरिन्छ।

उनले संविधानसभाबाट संविधान घोषणा भएपछिको दोस्रो चरणको निर्वाचन भएकोले यसलाई आफूले ऐतिहासिक महत्वको ठानेको बताएका छन् ।

जीत हार भन्दा पनि निर्वाचन राम्ररी सम्पन्न हुनु ठूलो कुरा भएको उनले बताएका छन् । उनले भने, विगतमा संविधानमाथि नै घात हुने हो कि भन्ने अवस्था आएको थियो । अहिले कुन पाटीले कति भोट ल्यायो भन्दा पनि स्वच्छ धाँधलीरहित निष्पक्ष निर्वाचन हुन ठूलो कुरा हो । संविधानमाथि नै प्रश्न उठाउनेको लागि यो निर्वाचन ठूलो जवाफ हो ।

यो चुनावले देशलाई नयाँ प्रक्रियामा लाने कुरामा आफू विश्वस्त भएको उनले बताए । गोरखाको निर्वाचन क्षेत्र न २ बाट उठेको भए पनि चितवन गृह जिल्ला भएकोले आफूले चितवन नछाडेको बताए ।