७ जेष्ठ २०८३, बिहीबार ०४:३३ बुधवार साप्ताहिक, नयाँबानेश्वर, काठमाण्डौं

‘डाबर मह’ गुणस्तरहीन ठहर, बजारबाट फिर्ता गर्न निर्देशन

काठमाडौं — डाबर नेपाल ले उत्पादन गरेको ‘डाबर मह’ न्यून गुणस्तरको पाइएको छ। खाद्य प्रविधि तथा गुण नियन्त्रण विभागले बजार अनुगमनका क्रममा संकलन गरिएको नमूनाको परीक्षणपछि उक्त महले तोकिएको मापदण्ड पूरा नगरेको जनाएको हो।

विभागद्वारा जारी सूचनाअनुसार बाराको जितपुर सिमरा उपमहानगरपालिका–२३ स्थित डाबर नेपाल उद्योगबाट उत्पादन गरिएको मह खाद्य स्वच्छता तथा गुणस्तर ऐन, २०८१ अनुसार गुणस्तरहीन देखिएको हो। प्रयोगशालामा गरिएको परीक्षणका क्रममा महमा आवश्यक गुणस्तर र स्वच्छताको मापदण्ड पूरा नभएको पुष्टि भएको विभागले जनाएको छ।

विभागका वरिष्ठ अनुसन्धान अधिकृतद्वारा जारी सूचनामा ऐनको दफा ३८ (२) अनुसार उक्त उत्पादनको बिक्री वितरण तत्काल रोक्न तथा बजारबाट फिर्ता लिन कम्पनीलाई निर्देशन दिइएको उल्लेख छ। साथै उपभोक्तालाई पनि सो उत्पादन खरिद तथा प्रयोग गर्दा सतर्क रहन आग्रह गरिएको छ।

खाद्य प्रविधि तथा गुण नियन्त्रण विभागले पछिल्लो समय बजारमा बिक्री भइरहेका खाद्य पदार्थको नियमित अनुगमनलाई तीव्र बनाएको जनाएको छ। विभागका अनुसार गुणस्तरहीन तथा अखाद्य वस्तु उत्पादन गर्ने उद्योगमाथि आवश्यक कानुनी कारबाहीसमेत अघि बढाइनेछ।

उपभोक्ताको स्वास्थ्यसँग प्रत्यक्ष सम्बन्धित खाद्य वस्तुमा लापरबाही देखिएपछि बजार अनुगमनलाई अझ कडाइ गरिने विभागको भनाइ छ।