६ भाद्र २०७१, शुक्रबार ०७:५३ बुधवार साप्ताहिक, नयाँबानेश्वर, काठमाण्डौं

बालुवा झिक्दा रातु पुल भासियो

बर्दिवास । पूर्वी तराईलाई जोड्ने रातु नदीमा व्यापक रूपमा ढुंगा, बालुवा र गिट्टी निकालिँदा अहिले पुल पूरै भासिन पुगेको छ । केही दिनपहिले आएको अविरल वर्षाका कारण रातु खोलाको पुल भासिन पुगेको हो । पुल भासिँदा बर्दिवास पूर्व सवारी साधन ओहोर–दोहोरमा अवरोध उत्पन्न हुन पुगेको छ ।
रातु खोलाको पुल भासिनुमा महोत्तरी जिल्ला विकास समितिले अन्धाधुन्ध रूपमा उक्त खोलाको बालुवा, ढुंगा र गिट्टी उत्खननका लागि ठेक्कामा लगाउँदा समस्या उत्पन्न हुन पुगेको हो । जिविस महोत्तरीले यही आर्थिक वर्षमा रातु खोलाको बालुवा, ढुंगा र गिट्टीको ठेक्का ३२ लाख १९ हजार रुपियाँमा शीतल निर्माण सेवालाई दिएको थियो भने धनुषा र महोत्तरीको सिमानामा बग्ने क्षेत्र बाहेकको रातु नदीको ढुंगा, बालुवा र गिट्टी आदिको बिक्री निकासी उठाउने ठेक्का पचथुरा मोटर पार्टस एन्ड जनरल अर्डर तथा खाद्यान्न सप्लायर्सलाई ६५ लाख ५० हजार रुपियाँमा दिएको थियो ।
सरकारले चुरे संरक्षणका नाममा चुरे क्षेत्रबाट बग्ने अरू खोला, नदी र खहरेहरूबाट ढुंगा, बालुवा झिक्न प्रतिबन्ध लगाए पनि रातु नदीमा भने निर्वाध रूपमा ठेक्का दिइरहेको छ । रातु नदी चुरे क्षेत्रबाट उत्पत्ति भई बग्ने खोला हो । यो खोलाले बर्सेनि धनुषा र महोत्तरीका हजारौं बिघा जमिन कटान गर्दै आइरहेको छ ।