३ बैशाख २०८३, बिहीबार १०:०९ बुधवार साप्ताहिक, नयाँबानेश्वर, काठमाण्डौं

काठमाडौंको खुलामञ्च पुनः सर्वसाधारणका लागि खुला

काठमाडौं । काठमाडौंको ऐतिहासिक तथा पहिचान बोकेको खुला स्थान खुलामञ्च पुनः सर्वसाधारणका लागि औपचारिक रूपमा खुला गरिएको छ। मर्मत–सम्भार तथा हरियाली प्रवर्द्धनसम्बन्धी काम सम्पन्न भएपछि उक्त क्षेत्रलाई पुनः सार्वजनिक उपयोगका लागि सञ्चालनमा ल्याइएको हो।

काठमाडौं महानगरपालिकाकी कार्यवाहक प्रमुख सुनिता डंगोल ले बिहीबार बिहान एक कार्यक्रमबीच खुलामञ्च उद्घाटन गर्दै यसलाई पुनः समुदाय केन्द्रका रूपमा सञ्चालनमा ल्याइएको जानकारी दिइन्।

महानगरपालिकाले मैदानमा घाँस रोप्ने, संरचनागत व्यवस्थापन गर्ने तथा वातावरणीय सौन्दर्य बढाउने काम सम्पन्न गरेपछि खुलामञ्चलाई नयाँ स्वरूपमा प्रस्तुत गरिएको हो। पुनः सञ्चालनसँगै यो स्थान अब नागरिकहरूको स्वास्थ्य तथा मानसिक सन्तुलनलाई ध्यानमा राख्दै योग, ध्यान, साउन्ड हिलिङजस्ता गतिविधिका लागि उपयोग गरिनेछ।

शहरको केन्द्रभागमा अवस्थित खुलामञ्चलाई स्वच्छ, हराभरा र शान्त वातावरणसहित पुनर्जीवन दिइएको भन्दै महानगरले यसलाई सार्वजनिक उपयोगको खुला स्थलका रूपमा दीर्घकालीन रूपमा संरक्षण गर्ने प्रतिबद्धता जनाएको छ।

खुलामञ्च पुनः खुला भएसँगै राजधानीवासीले आराम, व्यायाम र सामुदायिक गतिविधिका लागि सहज तथा सुरक्षित खुला स्थान पाउने अपेक्षा गरिएको छ।