१३ फाल्गुन २०७१, बुधबार १०:५० बुधवार साप्ताहिक, नयाँबानेश्वर, काठमाण्डौं

मनोनयन र कार्यविभाजन अझै टुंगिएन

काठमाडौं । अघिल्लो बुधबार नै टुंग्याउने भनिएको मनोनीत केन्द्रीय सदस्य र केन्द्रीय सदस्यहरूको जिम्मेवारी बाँडफाँटको काम एमालेले अझै टुंगो लगाउन सकेको छैन । मनोनयन गरिने १५ केन्द्रीय सदस्यहरूको नाम हिजोको बैठकमा टुंगो लगाउने भनिए पनि त्यो एजेन्डामा बैठकमा छलफलसमेत भएन ।
अघिल्लो सोमबार बसेको स्थायी समिति बैठकमा १५ केन्द्रीय सदस्यका लागि डेढ सयभन्दा बढी नाम प्रस्तुत भएपछि त्यसको टुंगो लगाउन अध्यक्ष केपी ओली, वरिष्ठ नेतााद्वय झलनाथ खनाल र माधवकुमार नेपाल, उपाध्यक्ष वामदेव गौतम र महासचिव ईश्वर पोखरेल रहेको कार्यलदलाई जिम्मा दिइएको थियो । कार्यदललाई गत बुधबारसम्मको समय दिइएको थियो । गत मंगलबार कार्यदलको बैठक बसे पनि सहमति जुट्न सकेको थिएन । त्यसयता एक पटक पनि कार्यदलको बैठक बसेको थिएन । सहमति नजुटेपछि यो बीचमा दुई पटक स्थायी समितिको बैठक स्थगित गरिएको थियो ।
हिजोको बैठकको
एजेन्डा नै केन्द्रीय सदस्यको मनोनयन भए पनि यो विषयमा छलफल प्रवेश नै गरेन । बैठक सुरु हुनासाथ अध्यक्ष ओलीले मनोनयनको विषयमा गृहकार्य पुगेको छैन, भोलि छलफल गरौंला भनेपछि बैठकमा संविधान निर्माणको विषयमा मात्र छलफल भएको सचिव योगेश भट्टराईले बताए । स्थायी समितिको बैठक आज २ बजेका लागि बोलाइएको छ । आजको बैठकले चाहिँ मनोनयनको विषय टुंग्याउने र अर्को बैठकमा कार्यविभाजनबारे छलफल हुने जनाइएको छ ।
हिजोको बैठकमा संविधान निर्माणको प्रक्रियालाई नयाँ ढंगले अघि बढाउने विषयमा छलफल भएको थियो । अहिलेको संवादहिनता तोड्दै दलहरूबीचको संवादलाई फेरि गति दिने निर्णय भएको पनि सचिव भट्टराईले बताए । त्यस्तै, पार्टीले मेची–महाकाली जागरण अभियान चलाउने निर्णय पनि हिजोको बैठकले गरेको छ । त्यसका लागि एक हप्ता भित्र कार्यक्रमको स्वरूप निर्माण गर्ने जिम्मा सचिवालयलाई दिइएको छ ।