१९ भाद्र २०७१, बिहीबार ०४:२६ बुधवार साप्ताहिक, नयाँबानेश्वर, काठमाण्डौं

सरकारी अड्डामा भद्रगोल

काठमाडौं । राष्ट्रिय सतर्कता केन्द्रले सरकारी अड्डामा गरेको आकस्मिक छड्केमा ती कार्यालयमा भद्रगोल अवस्था पाएको छ । केन्द्रले भदौ पहिलो साता २६ मन्त्रालय, ४७ विभाग र १० ठूला सार्वजनिक संस्थानमा सुशासन सम्बन्धी केही सूचकहरूको  अनुगमन निगरानीका क्रममा कर्मचारी बिदा नलिई अनुपस्थित हुने गरेको तथा निर्धारित पोसाक नलगाई कार्यालय आउने गरेको भेटिएको केन्द्रले जनाएको छ ।
ती कर्मचारीको विवरण संकलन गरी केन्द्रले कारबाहीका लागि सम्बन्धित मन्त्रालयमा लेखी पठाएको छ । केन्द्रको अनुगमनको क्रममा ३ सय ३३ कर्मचारी अनुपस्थित भेटिएको र ८२ जना निर्धारित पोसाक नलगाई आएको भेटिएको केन्द्रले जनाएको छ ।
त्यस्तै, अनुगमन गरिएका विभागका २ सय ४३ जिल्ला स्तरका कर्मचारीलाई केन्द्रीय स्तरमा काजमा राखिएको र सरुवा मापदण्ड तयार गरी लागू गर्नुपर्नेमा केही विभागले अटेर गरी सो मापदण्ड नै तयार नगरेको थाहा भएको छ । ती विभागका जिम्मेवार अधिकारीलाई  पनि कारबाहीका लागि सम्बन्धित विभागमा लेखी पठाएको बताइएको छ । अनुगमनका क्रममा अधिकांश कार्यालयको विद्युतीय हाजिरी प्रणालीमा समस्या आई बन्द रहेको पाइएको अनुगमनमा संलग्न एक अधिकारीले बताए ।
यस्तै, केन्द्रले सार्वजनिक बिदाको दिन सरकारी सवारी साधन दुरुपयोग गर्ने कर्मचारीको निगरानी गरी सम्बन्धित निकायमा कारबाहीका लागि सिफारिस गर्न थालनी गरेको बताइएको छ ।