१८ मंसिर २०७१, बिहीबार ०७:२७ बुधवार साप्ताहिक, नयाँबानेश्वर, काठमाण्डौं

तब बन्छ एमाले एक नम्बर

सम्पाकज्यू,
मुलुकको आमूल परिवर्तनको नेतृत्व एमालेबाट नै सम्भव छ, यो आम जनमानसमा रहेको विश्वास हो । जुन नौ महिने अल्पमतको एमाले सरकार, राजनीतिक परिवर्तनका ऐतिहासिक आन्दोलनहरूमा खेलेको अग्रणी भूमिका, वर्तमान शान्ति प्रक्रियामा खेलेको भूमिका र पार्टीले बोकेको सही विचारले नै हो । पार्टीलाई पहिलो पार्टी बनाउन सम्पूर्ण कार्यकर्ताहरू एकताबद्ध भएर संगठित रूपमा परिचालित हुने हो भने असम्भव छैन । यदि असम्भव हुन्छ भने अरू कसैको कारणले नभई स्वयम् एमालेको आफूभित्रकै आन्तरिक समस्याहरू व्यवस्थापन सही ढंगले समयमै गर्न नसकेमा हुनेछ । तर पनि अहिलेसम्म विभिन्न जनसंगठनहरूमा, पार्टी कमिटीहरूमा गुटबन्दीका सीमारेखाहरू मेटिएका छैनन् । विगतदेखिको वैमनष्यको भावना या एकले अर्कोलाई देखि नसहने प्रवृत्ति, रचनात्मक आलोचनाको परिपाटीको अन्त्य र शत्रुतापूर्ण व्यवहार प्रकट, अराजक गतिविधि, एकले अर्कोमाथि निषेध गर्ने प्रवृत्ति, मूल्यांकनको परिपाटीको अन्त्य, पद र प्रतिष्ठाका लागि जस्तोसुकै क्रियाकलाप गर्न उद्यत रहने, संगठनको काम गर्नेभन्दा नेताहरूको चाकडीमा बढी क्रियाशील र नेताको नजिक रहनेहरूले नै पार्टीबाट पाउने अवसरहरू लिने हुँदा पार्टीका लागि मरिमेटी काम गर्ने कार्यकर्ताको ऊर्जामा ठेस लागेको छ । यसले गर्दा पार्टीमा काम नगरेर पनि ठाउँमा पुगिँदो रहेछ, पद प्रतिष्ठा सबै प्राप्त हुने रहेछ भने किन पार्टीका लागि काम गर्ने भन्ने चिन्तन बढ्दो छ ।
यस्ता खाले पार्टी विस्तारमा आघात पुग्ने क्रियाकलाप नेतृत्वदेखि जिम्मेवार कमिटी र सम्पूर्ण कार्यकर्ताहरूले सुधार गर्न जरुरी छ । अन्यथा पार्टी हुल हुज्जतेहरूको, कुण्डले र नवमण्डलेहरूको समूहको रूपमा रहने निश्चित छ । यो विषयमा बढीभन्दा बढी युवा पुस्ताका नेतृत्वहरूले सुझ्बुझ्का साथ आफ्ना क्षमता प्रकट गर्दै भविष्यमा युवाहरूबीच एक–आपसमा हार्दिकताको वातावरण, एक–अर्काबीच विश्वासको वातारण सिर्जना गरी मन जित्ने काम, सहयोगी भावना, अग्रजहरूको सम्मान, भावी पिँढीलाई माया गर्ने, पार्टी पद्धतिमा चल्ने/चलाउने कुरामा दृढ, विगतका गल्तीबाट पाठ सिक्दै राम्रा कुराहरूको निरन्तरता दिने परिपाटीको सुरुआत गर्न जरुरी छ । अनि मात्र युवा पुस्ताले एमालेलाई बलियो बनाउन सक्छ । त्यसकारण नेकपा (एमाले)लाई साँच्चिकै एक नम्बरको पार्टी बनाउनका लागि व्यापक रूपमा युवा विद्यार्थीहरूलाई पार्टीको सिद्धान्त र विचारले प्रशिक्षित गर्दै गोलबन्द गरेर संगठित रूपमा परिचालन गर्न पनि त्यत्तिकै जरुरी छ ।
पुराना पुस्ताले गरेका राम्रा कार्यहरू आउने पिँढीसम्म लैजान र नयाँ पिँढीलाई पनि अग्रजहरूको बाटोमा हिँडाउन महत्त्वपूर्ण भूमिका युवा पुस्ताकै हुने भएको हुँदा यो पुस्तालाई अनुशासित, प्रशिक्षित बनाएर संगठित रूपमा परिचालित गर्नुपर्छ अनि मात्र एमालेले अँगालेको विचार  र सिद्धान्तमा टेकेर वर्तमानमा घोषणा गरे जस्तै पहिलो पार्टी भविष्यमा निश्चित रूपमा बन्नेछ । अनि नेपालको आमूल सामाजिक, आर्थिक रूपान्तरण गर्न सकिनेछ । यसैमा मुलुकको कल्याण छ । युवाहरू एकचोटि पुन: हातेमालो गरेर संगठित रूपमा लागौं । मुलुकको आमूल सामाजिक, आर्थिक र सांस्कृतिक रूपान्तरण गरौं ।