१ माघ २०७१, बिहीबार ०५:११ बुधवार साप्ताहिक, नयाँबानेश्वर, काठमाण्डौं

उद्योगमा अध्यागमन एकाइ

काठमाडौं । उद्योगमन्त्री महेश बस्नेतले उद्योग विभागमा अध्यागमन एकाइको उद्घाटन गर्नुभएको छ । एकै थलोबाट स्वदेशी तथा विदेशी लगानीकर्ताहरूलाई सेवा सुविधा प्रदान गर्ने पद्धति, एकद्वार प्रणाली अन्तरगत उद्योग विभागले विदेशी लगानीकर्ताहरूलाई विभागबाटै भिसालगायतका सेवा सुविधा प्रदान गर्न अध्यागमन एकाइको शुभारम्भ गरेको छ ।
मन्त्री बस्नेतले एक कार्यक्रमकाबीच चार जना विदेशी लगानीकर्ता (जापानी र अमेरिकी नागरिक)लाई भिसा प्रदान गर्नुभयो । उहाँले अध्यागमन एकाइको स्थापनासँगै विदेशी लगानीकर्तालाई सुलभ र सरल रूपले नेपालमा लगानी गर्ने वातावरणको सुरुआत भएको बताउनुभयो । उहाँले एकद्वार प्रणालीको सुरुआतबाट विदेशी लगानीकर्ताको नेपालमा लगानी गर्ने अभिरुचि बढ्ने विश्वास व्यक्त गर्नुभयो । उद्योग विभागका महानिर्देशक महेश्वर न्यौपानेले स्वदेशी तथा विदेशी लगानीकर्तालाई आकर्षित गर्न विभागले एकद्वार प्रणालीअन्तर्गत अध्यागमन एकाइको स्थापना गरेको जानकारी दिनुभयो ।