१४ माघ २०७१, बुधबार १०:५१ बुधवार साप्ताहिक, नयाँबानेश्वर, काठमाण्डौं

यती ट्याक्स फ्रि फिक्स डिपोजिट सञ्चालन

काठमाडौं । यती डेभलपमेन्ट बैंकले यही माघ २ गतेदेखि निक्षेपकर्ताहरूका लागि आकर्षक २५ महिने ट्याक्स फ्रि फिक्स डिपोजिट खाता सञ्चालनमा ल्याएको छ ।
यस निक्षेप योजनामा निक्षेपकर्ताहरूले ८.५० प्रतिशतका दरले त्रैमासिक रूपमा ब्याज प्राप्त गर्न सक्नेछन् र ब्याजमा लाग्ने कर भने निक्षेपकर्ताहरूको ब्याजमा कट्टा नगरी बैंक आफंैले भुक्तान गरिदिनेछ । यस योजनामा सहभागी निक्षेपकर्ताहरूले एनटीसी, एनसेल र डिसहोम आदिमा २ सय ५० रुपियाँसम्मको टप अप गर्न सकिने थप सुविधा प्राप्त गर्नुका साथै लकर सुविधामा ५० प्रतिशत छुट पाउने बैंकले जनाएको छ । बैंकले ग्राहकहरूको सुविधालाई ध्यानमा राखी प्रधान कार्यालय दरबारमार्गबाट साँझ ८ बजेसम्मको सन्ध्याकालीन काउन्टर र शनिबार तथा अन्य सार्वजनिक बिदाका दिनहरूमा दिउँसो १२ देखि २ बजेसम्मको होली डे काउन्टर सञ्चालन गरिरहेको बैंकले जानकारी गराएको छ ।
एनएलजीले २१ प्रतिशत लाभांश दिने
काठमाडौं । एनएलजी इन्स्योरेन्सले सेयरधनीलाई २१.०५ प्रतिशत लाभांश दिने भएको छ । आर्थिक वर्ष २०७०/०७१ को नाफाबाट चुक्ता पुँजीको १५ प्रतिशत बोनस सेयर र ६.०५ प्रतिशत नगद लाभांश दिने सञ्चालक समितिको प्रस्ताव बुधबार राजधानीमा सम्पन्न कम्पनीको नवौं साधारण सभाले पारित गरेको छ ।
गत आर्थिक वर्षमा कम्पनीले १७ करोड २८ लाख रुपियाँ खुद नाफा कमाएको थियो । जुन अघिल्लो वर्षको भन्दा १३.५९ प्रतिशतले बढी हो । कम्पनीको चुक्ता पुँजी ३४ करोड १५ लाख रुपियाँ छ ।
कम्पनीले यो वर्ष पनि विगतका वर्षहरूझैं २० प्रतिशतभन्दा बढी प्रतिफल दिन सफल भएको प्रमुख कार्यकारी अधिकृत विजयबहादुर शाहले बताए । गत आर्थिक वर्षको असार मसान्तसम्ममा कम्पनीले ८९ करोड ९२ लाख रुपियाँ बिमा शुल्क आर्जन गरेको शाहले जानकारी दिए ।
अघिल्लो वर्षको तुलनामा गत वर्ष ९.६२ प्रतिशतले कुल लगानी वृद्धि भई १ अर्ब ७ करोड १० लाख रुपियाँ पुगेको छ ।  आव ०७१/७२ को मंसिर मसान्तसम्ममा कम्पनीको कुल कारोबार गत सालको सोही अवधिको तुलनामा १३.८० प्रतिशतले बढेको शाहले जानकारी दिए । मंसिर मसान्तसम्ममा कम्पनीले ३५ करोड ३६ लाख रुपियाँ बिमा शुल्क आर्जन गरेको छ । गत वर्ष कम्पनीले ३ शाखा विस्तार गरेपछि हाल कम्पनीले कुल २७ शाखाबाट ग्राहकलाई सेवा प्रदान गरिरहेको छ ।
पोटिफोलियो विविधिकरण गर्ने नीतिअनुसार २०६९ मंसिर २७ गते पशुधन बिमा र माघ २ गतेदेखि बाली बिमा सुरु गरेको थियो ।  पशु र बाली बिमाका लागि एनएलजी इन्स्योरेन्स सञ्चालनमा रहेका १७ बिमा कम्पनीहरूभन्दा अग्रस्थानमा रहेको शाहले बताए ।